Pa Ozüng Nung (T.Ken 103:19-22)

Tanü na timtem nung liaka, teimla maka osang angashiyonga kecha masü, ibaji mataloktsü akok! “Kibubai pa menden anüngtem nung yanglua lir; aser Pa yimli ajak madak chubatsü” (t.19).
Tsüngrem Kotak chuba menden nung lir aser tatalokba ajak Pai azüoker. Ken ken yamaji meinyaker ama asütsü akok. Nai tanguba agi jajara idakji Tsüngrem aliba memetettsü. Mesüra idakji Tsüngrem lira Pai anebalur asü? Mesüra, Pai anebalura, Pai ajak inyaktsü akok asü? Ken züluri asenok dang ashir, “Tanguba agi tejaja; tamang agi jajaang.”
Tsüngrem temeranger telok ka kar. “Kibuba moajang, nenok Pa kotak tenyartem: Pa ola nung tenarong tenang, Pa ola angang, nenok tashi tulu rogo” (t.20). Tenyartemi Pa ozüng nung inyaker. Asenoki Pa o züngra aser Tsüngrem O benshira aser tashi angara, alima nung mapa ajak asenok den inyaktsü. Asenoki Tsüngrem O nung tashi mangara, ajaki asenok anema inyaktsü -Yona dang inyakba ama, shibai Tsüngremi tuyuba toktsür rong tai nung mener, nükjidong tamajung nung ao. Tatem nung Tsüngremi tashi angaba lemangi pa anir aru.
Yona ama teli. Tsüngremi ajak azüoker aser tia ajak nung ne dak mapa inyaker ta amangang.
Ne anogo mejungaka mesüra teimla makaba osang angashiaka kecha masü, Tsüngrem chuba menden nung lir ta amangang. Pai yimsü asür aser Pa tenzükertemi Pa o ataloktsür. Tanü Tsüngrem O nung amangang aser tamang agi jajaang.