PA SHIA ARUOGO

 Mrs. R. Mapula. Pongen
Chuchuyimlang, Merangmen, Tsürangkong

Sentsüwangshi tamaren Kotak li nungi,
Tesembatsü temenen limai, Tsüngrem temeim sempet tulu,
Amang nung ajemzüa alir dangi tesangwa milen bener
Maksü aser timtem khuret abentsü alisang Tsüngrem San chanu,
Iba temeim alang ya ali nungbo kecha sempet-a makaka
Ali meimchirtemi iba temeim indang tebang agibo jembitsü tamakoktsü.

Alimai nüngtugu süa mejembiba tetsür Mari ajanga,
kümtetdakba Yisu Khrista Bethlehem nung aso
Pa asodang Chuba kidang tsüngtsüng matem, mistri kibong ka nung intet,
Tepenjem mapang ajunga akümli tia jangra matem ali
Meimchirtem rongnung kari danga nai junga inyakogo ta ashir lilasang,
Ozü tanüla anisüngzük ngula, saka ya ajak aremtsü Yisu alimai aru.

Yisu-i akümli mapa tatemer ta meteta liasü, Pa shidakba Tsüngrem chir ta,
Ainkari küm aika lia shinba otem… asangsang nung atalokogo,,
Yirusalem nung kümtettsü benjong amongnü, atangji nung jungkai atok,
Kotak aser ali chuba ta, tulu tila ajaki ayimten
Ajemalu Gado rongdong nung sanger, tsüngmok amoker medem,
Aongmetang ola jagi meimchir molungjang anokshimeso.

Ali pokli nungi shingaia mesemdangba korang ka Yisu-i asem,
Nakrema meremba sü ka abenlokja parnoki pa nem salem agütsü,
Na Yihuda nunger chuba ta sensaja apudaka Pa külema mezüngmeshi,
Pa dak tekolak nung ritsüng agi azük, aya tzüra telumi tia pai ajuru,
Lenmang piyong kangki taret apur jajadang, aria bilemtsür shinga maliasü,
Oh! Yisui ayi korang asembaji, asenok nem tekümtet agütsütsü mechi liasü.

Golgata tenem tonger Pai apuba kangki nung angenlok, ibai Yihuda nunger Chuba ta zülu,
Ni tzürar ta ashidang, tanükertemi Pa nem tasentsü jemdaktsü,
OBA, kü tanüla nü nem bendanga agütsür ta shia amuzüka ao,
Tanükertem rongnung Pa suoshi lemsa, leper tasen ka nung parnoki pa arem,
Iba lep manung temaitsü ajenloktsü, aser Rom sepaitem nem nükdaktsü,
Onoki Yisu tepsetogo ta pelatepa tsüngsangtep.

Reprangang… Aoksa -a tepelatsü osang ka, leperi Pa memeyimtet…
OH tasüba, nü temedakba ain kong ali ! Oh leper, nü talenba yongrak kong lir !
Pelatepang, Yisu shia arua lir ta alima dang ayimokjang,
Tanü Yisu taküm lir, asenok asoshi tekümtetji pai alangzüktsüogo,
Tajepba, mulungzürep, tetsübu, terara ajak tepela agi melentsüogo,
Tsükchirtem ajak madak takok ngur, Pa asen den lir. HALILIYA !