Pa shia aruogo

Pa yangi mali, kechiyong pai ashiba ama, pa shia aruogo; arung pa mejangdak ajiang. Matt. 28:6

Yisu shia aruba ya asen Khristan tamang tamendakdak lir. Yisuji tasü madak takok ngur shia maru nungbo Khristan tamangji tasü, amajok ta 1 Kor. 15:16 nung shia lir.  Anungji Yisu shia aru nungji ya asen tamang tamendakdak lir. Marakzüba lungji kechai-a melenshitsütsü makokba lung dak asen tamang amendaka lir ta tenyar Paul-i küli agütsür. Shia aruba ya meimchir asoshi Tsüngremer sentong liasü. Shia aruba jagi Yisuji Tsüngrem nungi ta jangja-a metendaktsür. Tejen Lai nung Yisu asotsü Pai inyaktsütem mapa, Pa asütsü, shia arutsü item shinba ajak yagi Khristan tamang abensadaktsüogo. Anungji iba dak shirnoki amanger parnok ajak Tsüngremi metendaktsüogo. Parnok rongnung asenoka adentsüsa Pa dangi asen menen mulung bener odi. Shia aruba Khrista kechi koda leper koker shia aru, aji oda asen menen leper doktsüdi aser shia aruba Yisu dak amanga Pa tsüngdangi odi. Pai shidoktsütsü, aneptsür aser arishi agütsütsü.

Sarasadem:  Haliluya shia aruba Yisu, kü temenen leper doktsür Nü taochi langpang dangi arur. Kü dang aochiangma ta mepishir. Amen