PAC NCD & DUCCF-i Dimapur Police dang pelar

Dimapur, Yimpoksüi (November) 27 (TYO): NSCN -IM züngsemtemi Riven Honda dokan nung injang khaloktsüba aser Aoyim Baptist Church yangluba atema FGN züngsemtemi tashiyim agi sen saruba ken o tem dak tai tonglokja alirtem Dimapur police-i mapang shitak nung apuba atema kanga pelar, ta PAC Naga Council Dimapur-i metetdaktsü.
Mapang shitak nung police-i aibelenertem pua aruba ajanga November 30, 2018 nü mokdangtsü ayongzükba meyipa agir ta PAC NCD-isa ashi.
Ozüng amertemi aibelenertem nem bail temelaba magütsütsü saka ozüng tapet agi merenshitsü akhanger. Maneni sensotem kanga jeretpera alitsü aser pei temeket nung ozüng alema mapa inyakba tatalokbatem police nem osang sangoktsütsü mepishir, ta PAC NCD-isa metetdaktsü.
November 20, 2018 nü Riven Honda showroom, River belt colony Dimapur nung injang khaloktsüba dak sendakba nung Dimapur Police-i nisung asem apuba atema tenüngsang agütsür, ta Dimapur Urban Council Chairman Federation (DUCCF)-i metetdaktsü.
Maneni, tenla ki yangluba tesem nung tashiyim agi sen sarur Khehokhu yimer Kughato Swu apuba atema kanga pelar, ta DUCCF-isa shisem.
Police-i ken o tem jungjunga bushisüngdang asütsü aser aibelenertem ozüng tapet agi merenshitsü atema ayongzüker. Police-i parnok kanga dang meranga parnok teinyaktsü tim inyaker ajisüaka pei pei teloktemi pei kin aser telok nung ozüng alema mapa inyakertem azüoktsüla, ta DUCCF-isa metetdaktsü.
Mapa tamajung inyakertem azüoktsübaji kanga tasak süra, parnok aitsütsüla aser loktiliba nungi jendoktsüla. Naga nungertemi ozüng akhümtsübutsüla aser tamajunger dangbo tamajung ta ajatsüla, ta parnokisa shisem.
Ozüng alema mapa inyakba teloktem ket nung Dimapur azüoka meyudaktsütsüla aser Naga Council Dimapur nung PAC den külemi DUCCF noktaka lir aser onoki Dimapur nung tashiyim agi sen saruba aser ozüng alema inyakertem anema raratsü, ta DUCCF-isa metetdaktsü.