Hombarnep New Field check gate nung PAC volunteers angur.
Dimapur, September 16 (TYO): Naga Council Dimapur kübok Public Action Committee (PAC)-i tanü nungi inter- state check gates mita anükba mapa tenzükogo.
Ozüngi memelaba tax saruba inyakyim noktangtsü atema PAC-i Hombar nungi iba mapa inyaktsü tenzük.
Telok balalai tax onsara saruba ajanga Dimapur nung kechisarena ajak nung jenjang tuogo, ta PAC züngsem kati ashi.
Bangdakpurtemibo anepdang 5:00 ako nungi 7:00 ako tsüngda gari tulu aitdaktsür ta ashi saka khu abenba gari aika anepdang 5:00 ako matongdang Dimapur telungi ait. Anungji, timtem kar dang ajurura truck gari kiburtemi iba tebilemtsüji abentsü, ta PAC-i metetdaktsüogo.
Tanü truck gari anirtem aika kanga raratep kechiyong tesüiba anogotem ama mesüi, tanübo parnoki police toll booth nung tax magütsüi dang Dimapur telungi aitdaktsü. Taoba mapangbo handyman-i mezüng toll booth nung tax agütsüba sülen ang gari telungi aitdakja liasü.
Tanü PAC-i bushitetba inyakyim kaji, Municipal body-i poultry products atema jenjang lateta aliba nungi 100 % talila meshiba liasü.
Display board nung poultry products indang tract/rack ka nung Rs. 10 ta zülua lir saka parnoki Rs.800 meshir, ta PAC züngsem kati ashi.
Ano, sorkar department anati sand & mining products nung tax anaben meshir aser iba ya tesüngmangtsüka lir, ta paisa shisem.
State sorkari iba onük atema osang tejangja ka magütsü tashi onoki department ana nem tax mesarudaktsütsü, ta paisa metetdaktsü.
PAC-isa Vety & Animal Husbandry department-i mapa shitak meinyakba bushitet aser department toll booth aika melapok.
Iba mapa nung nübo aser mapang agüja yariteper ajak dang kanga pelar. Naga nunger ajangzüktsü atema yaritepba asoshi pelar aser tanü inter-state check gates nung mapa inyakdang, shingaia ozüngi alema mapa kecha meinyak, ta PAC-isa metetdaktsü.
You must be logged in to post a comment Login