PAC züngsem 5-i Dimapur Railway semdang

Dimapur, April 05 (TYO): Bodhbarnü Indian Railway Passengers’ Amenities Committee (PAC) nungi züngsem pongui Dimapur railway station semdanga liasü aser Railway-i passenger tem nem agutsüba facility balala reprangshia liasü.
Northeast nung saru timba anguba railway station ji Guwahati lir aser tanabuba jenjang nung Dimapur Railway station lir.
Tanü Dimapur nung osangbenertem den jembidang L.P Jayaswal-i, terenlok tsütsü Dimapur railway station ya A1 category nung lir aser passenger nüngdaktem junga agutsür, ta ashi.
Ajisüaka tesasaba olen ka nung pai, tashi maliba nijatemi tetsüdaktsü agutsüba ajanga rail line tasen aser platform No. 2 nung kilem metongteter, ta ashi.
PAC züngsemisa Nagaland sorkar dang, tesem nung terenlok lia nüburtemi tajangzük angutsü atema Railway jenjang tajungba akumtsü atema inyakdaktsüner, ta ashi.
Jayaswal-i ashiba agi, Ato kilonser, Narendra Modi-i northeast tesem terenlok atema nendaka inyaker aser Ministry of Railways-ia project aika tenzüka inyakdar.
“State sorkari Railway den amalitepa meinyakra nüburtem nüngdak peritsütsü atema tasak asütsü,” ta paisa shisem.
Senior Division Engineer- IV, George-ia, Railway authority-i rail line tasenba atema benoka aliba tesemtem nung kiojen aienshidaktsü, ajisüaka ibaji ajanga kongshirtemi ken o ka benok, aser iba ken oji tang Court nung lir, ta metetdaktsü.