Pacific linük 12-i tongti shishilembatsü tezüngzüktep agir

New Zealand kübok Auckland nung Pacific linük 12-i tongti Trans-Pacific Partnership (TPP) shishilembatsü tezüngzüktep agiba jakdang New Zealand Ato Kilonser, John Key (Abelen)-i TPP senden nung o jembiba noksa nung angur. (Auckland, February 04)

Auckland, February 04 (Agencies): Pacific region nung tentetba linük 12 nungi shishilembatsü minister-temi par linük rong nung tetsükdakba kecha meli shishilembateptsü tezüngzüktep ka New Zealand kübok Auckland nung tanü, Brehostibar nü agiogo.

Pacific linük rong nung terenlok alitsü, nüburtem asoshi mapa inyaktsü lenmang lapoktsütsü aser par rongsenren jenjang temaba jenjang nung ajungkettsütsü nükjidong nung linük 12-i tan tezüngzüktepji zülutepa agiba osang jangjaogo.

Tan tezüngzüktep agibaji US Tir, Barack Obama-i küm 7 tashi Tir menden abendang takokba tulutiba bener arutsür lir.

“Pacific linüktemi tan Trans-Pacific Partnership (TPP) tezüngzüktep agiba ajanga nübur nisung million jenti nem tajangzük tulu bener aruja parnok taküm jenjang tajungba kümdaktsütsü,” ta Obama-i metetdaktsü.

Obama-i tongti shilem agia küm 7 tashi jembitepa aruba sülen TPP tezüngzüktep ya tan asangsang nung zülutepa agir lir.

Tan tezüngzüktep agiba sülen Pacific linüktemi gari, mozü mora aser nashi nungi anguba chiyongtsütem densema, shishilembatsü osettsüset jenti den sentakba sarusaji ajema agitsü nangzükteper lir.

Tanü agiba tezüngzüktepji linük 12 prongla nungi parliament aser yimsüsürtemi agizükba sülen ang mapa küma benshitsü.

Tanü tezüngzüktep agir rong nung US den külemi, Australia, Brunei, Canada, Chile, Japan, Malaysia, Mexico, New Zealand, Peru, Singapore aser Vietnam linüktem densema lir.

Iba tezüngzüktep agitsü asoshi China linüka jaoka liasü saka par linüki tezüngzüktep agitsüren nung shilem magitsü lemteta tanü amenba TPP senden nung shilem magi süidaktsü.