PADC-i ADC meshiba magizüker: AAPSU

Itanagar, June 3 (Agencies): Linük Temzüng nung Arrla 371(A) kübok Tirap, Changlang aser Longding district tem nem Autonomous District Council (ADC) agüjang ta Patkai Autonomous District Council (PADC)-i akhangba magizüker ta All Arunachal Pradesh Students’ Union (AAPSU)-i tanüa nenshia metetdaktsüogo.
1963 küm Nagaland nem state jenjang agütsüdang Arrla 371(A) ji parnok nem balaka agütsüba lir aser ibaji 1960 agreement nung shia aliba ama inyakba lir. Ajisüaka, PADC-i Nagaland Statehood Bill nung ajemdaker ADC akhanger. Iba ya tebilemtsü tulu ka lir aser odangbo metoktsütsü, ta AAPSU-i metetdaktsü.
“Tirap-Changlang-Longding (TCL) nung alirtemi tanga state ka indang Statehood Bill nung ajemdaker masü saka Sixth Schedule kübok Autonomous District Council tentettsü atema takhangba agütsüba asoshibo AAPSU-i anema menokdaktsü” ta parnokisa ashi.
“Ajisüaka, PADC-i Linük Temzüng Arrla 71(A) kübok ADC agüjang ta takhangba agütsüba anema maneni nokdaktsü” ta AAPSU-isa shisem.