Padma sempet angur kati Manipur sorkar dak tai tongloktsü

Imphal, Tsüklai 12 (Agencies): Manipur nung taküm Padma Shri sempet angur kati BJP-i aniba state sorkar dang tejak repranga mapa inyaker ta tai tongloktsü.
State sorkari tanga Padma sempet angur state weightlifter, Saikhom Mirabai Chanu nembo tenüngsang agütsü saka la nembo magütsü ta Subadani-i ashi.
Aenjeti 27, 2018 nü Chief Minister N. Biren Singh den tanga Minister tem aser ketdangsertemi Chanu nem tenüngsang agütsüba sentong ka nung aden aser idangji la nem sen lakh 20 senpet agütsü.
Northeast tesem nung sü atakba maparen nung shilem tajung agiba atema Subadani nem Padma Shri sempet agütsü aser lai Amungnü osangbener den jembidang, lai sen atema mebilemer ta ashi.
“State sorkari kü nembo sen magütsü mesüra sentong kecha ayonga magi. Iba ya nisung bendanga amshiba inyakyim ka lir, kechiyong künaprongi kasa sempettem angu,” ta laisa shisem.
Ajisüaka, state sorkar ketdangser kati ashiba agi parnoki Subadani züdoka meindok.
“Iba onük anaji balala lir. Mirabai Chanu-i mapang talangka lir külen weightlifting nung alima otsü tasen ka yanglu aser India atema konang bentsür aru. Iba atemaji la nem senpet agütsü. Iba ya Manipur nung saisapongertem ajungkettsü nükjidong nung lir. Tesüiba mapang nunga Manipur nungi saisapongertem nem Padma award agütsüogo saka parnok nem tenüngsang agütsüba sentong mesüra senpettem magütsü,” ta ketdangseri ashi.
“Ni sen atema bilemerba masü. Künaprongi India sorkar nungi kasa sempet angu anungji tejak mereprangi dang tenüngsang agütsütsü. Iba ajanga sorkari tejak repranga inyakba kuli sayur” ta Subadani-isa metetdaktsü.