Padmaavat film sayatsüba atema Delhi Police renemshir

New Delhi, Aenjeti 20 (Agencies): Sanjay Leela Bhansali-i indang film ‘Padmaavat’ sayatsüba anema Shree Rajput Karni Sena puri longkak aitsüba ayongzüka aliba mapang ka nung Delhi Police-i Rogonü ashiba agi, linük yimtiba nung iba film taruba hopta ozüng tsütsü kecha timtem madoki süngjem süngjema sayadaktsütsü asoshi tinyaktsü tim maparen ajak tembanga inyakogo.
Commissioner of Police, Dependra Pathak-i ashiba agi, “taruba hopta linük yimtiba nung ‘Padmaavat’ film sayatsü aliba dak sendakba nung onok renema lir. Onoki cineplex managements tila aser tulutem ajak den mapang shia osang tsüsang agitepdar.”
“Onoki security tsütsü kanga junga renemer lir aser talila force dena renemer yua lir. Temzüng ozüng dak sendakba nung timtem kecha madokdaktsütsü asoshi onoki lokti balala dang azüzükteptsü asoshi mepishir,” ta Pathak-i ashi.
Karni Sena puri Padmaavat film sayatsüba ya mapang talangka nung anema arudar. Parnoki ashiba agi, iba film otsü ajanga alima puti otsü melenshitsür.
Padmaavat film ya Aenjeti 25 nü sayatsü asoshi renema lir, saka state aika nung iba film sayatsüba nokdangogo. Maneni lenir aikati iba film ya anemba osang balala nung angazükogo.