Padmashree W. Nokdenlemba tushitsü ya tim

~ S. T. Yapang. Lkr. Kohima.

AKM ajanga 2 buba Padmashree W. Nokdenlemba volleyball asayamung Nov 11-13, 2015 tashi ayongba ya kangasa tim ta temulung ajak agi agizükteter.
Waromung nunger Wb. Imkongangnen aser Wt. Tenachila tena jabaso W. Nokdenlemba ya May 22, 1901 nung aso aser April 15, 2012 küm alima nungi pila.
Aor samanir aika rongnungi W. Nokdenlemba ya kangasa tapet aser tetemsü ta bushiteter. Tanüngba samanirtema mapang tetemsü nung mapa den apet bilemteta amshitsüji tim.
Tenembuba ANBAM 1946 küm Changki nung sentepdang Tejen Lai meyiptsü renem aser iba asoshi tongti temeyiperji W. Nokdenlemba shimtet. Iba mapang tashi Tejen Lai nungi kaket rangben meyipbaji Lipok ya dang liasü, ibaji Mrs. E. Smith-i 1939 küm Rev. R. B Longwell dena meyip, kaket ajak memeyipaka Yosep otsü aser Tenüngsang Ken nungi Dawid Ken ta sür tapu ishika meyipa amshia liasü (Iba mapang tashibo Tenüngsang Ken dang ya Dawid Ken ta jaa liasü, Ao Christian Kaketkeno Committee tanaben 1952 nung sentepdang ibaji melenshi, anosa parnoki ojang aika meyipa Laishiba meyipba nung teyari tulu agütsü).
Laishiba ajunga asen oshi nung meyipzükba ajanga tamangertem tanela chiyungtsü anguba dang masü oshioben aser alima shisatsü nunga kanga renlokdaktsüogo.
Alima sensak tia den India nunger den nüchiso tongpang nung noktakba tiyalong nung asen lenirtemi koda timtema inyak itemji ‘Ao Laishiba Jurila Otsü’ I. Ben Wati, ‘Ao Baibel Meyipba Otsü’ aser ‘Kept by the power of God: The story of my life’ W. Nokdenlemba, ‘Taküm Milen’ ABAM item kakettem ajanga jangja meteter.
Asen Aor ajaki ama Tejen Lai meyipba nung W. Nokdenlemba tongti liasü ta meteta lir, ajisüaka Laishiba meyipba dang nungi tanga kaket timba meyip aser iba tensa alima kanga timtem tia nung liasü.
Asen Ao Mungdanga (ABAM) tanelar lu nung dang rongsen intokba ajanga Impur nung tenzükertem kangasa timtem tia ajuruogo ta angateter, ajisüaka item temoatsütemji tanü aseni agidaki. Laishiba meyipdang Mungdang koba jenjang ka nung lia Impur nung inyaker timtema liasü (?) ta süra, asen Ao Mungdang ket nung aliba typewriter-ji tamajung asüba den ‘ü’ mali asü, anungji Laishiba meyipba ajak type agi ajenbaji mejangjai timtem dang jenti adok, ano asen Ao nung ü ya kanga bulua lir, saka Ao Mungdang ket nung aliba typewriter nungji ü mali asünungji u dang ajener teka agi ‘ü’ küma zülushi. Ano Aor tashir jenti adok nungji Ao nung ojang ya magitsü ta, ibai tajungba ta melenpet melen, anungji Laishiba rangben melenshijen melenshi ta janga zülua angur, tanü amai computer nung ajener asübo ojang ishika melenshitsüji kecha tasak mali, saka par mapang typewriter dang asünungji tangar dang meshiaka W. Nokdenlembai Laishiba ajunga ya aiben ajenshiogo ta pai zülua yutsüba nungi angateter.
Pai meyipba den teyariteper nisung balala nungi Laishiba meyipbaji Impur typewriter nung ajener Kolkata-i bener ao, pai yang nungjaki Laishiba nung timtem aliba yamai zülu, kechiyong Laishibaji tangsa tang adoktsü amai nüburi aginüa tzürabaji kangasa tulu liasü, saka Laishiba meyipba telung mapaji nüburibo memetet.
“Arung asenok ajaki mezüngbuba kaket Lipokji külemi meyipdi:
1. Ao o nung tebur aser tetsür anaprong asoshi pa, par ta dang amshir. Tetsür asoshi la, lar ta melen yonga oang. Lipok kisüng nung danga 140 shi angutsü.
2. Zülu nung temelenshi adok nungji, ü ji e agi melenyonga oang. Yamai: nü-ne, bilemür-bilemer, ajüm-ajem, timtüm- timtem. Nai Laiji memeyipaka, iba amaji dang anogo shia Lai ajunga tapu kaka renema ora, küm asem sür ita asem nung renemtsü.
3. LORD- Tamasa Tsüngrem ta meyip, ano meyipa Yihova agi melen. Ano meyipa ajakji aidoker KIBUBA ta melenyonga oang. Lai ajunga nung 1,855 ben zülua angutsü.
4. Typewriter nung ‘ü’ mali, anungji ajenmar külen kaket menüngdaki yoktsü pen agi ‘u’ nungji ‘ü’ yamaji ajenyonga oang.
5. Küm pezü tashi Mungdangi typewriter ka alia meyutet. Tang tejen kaji zülujang mejangja. Calcutta typist-i majenli asür, anungji mejangjaba ajak khen zülushitsüsa akümer.” (Ao Laishiba Jurila Otsü, tapak 61-62). Iba typist yagi tezü danger toktsür aoba “Ao Baibel Meyipba Otsü” W. Nokdenlembai züluba kaket tapak 10 nunga yamai shia lir “1954 nung Typewriter tejen ka Mungdangi alizükba jaki ajenbaji mejangjaba agi la tezüdangadok aser inyaktur oadok. Ni tia kaa, ni temulung alemba asangur Kiremwati, Calcutta University nung ajuru. Ni Secretary Featherstone den tongteprateper tanüngba kaket ajakji pa nem Calcutta Bible House nung ajendaktsü. Pai kanga dang temulung agüja inyak, Pai teyari tulu agütsüba asoshi Mungdangi pa dang pelatsüla”
Nokdenlembar kibong :
Nagalima tensa kanga mejungi akümba ajanga nüburtem tebang agi meshitetba timtem ajurua rokongtep. Ao lima tekonglu meyimtettsüsa mapang agi bena aru, aser iba ajanga Impur Mission nung mapa inyakertem timtem kanga ajuru.
Laishiba meyipzükba mapa nung ghonda aika belema inyaker ano iba sülen kishikinar yimtsüngtemi oa tsük alidi ta mepishia yima senzü. Par chir tain longlong dang terka liasü, aser iba mapang nung par kibongji pa itasen tila nung dang metaloker liasü. Kenü anogo iba ama amennokdak makai inyakba mapang ka nung, yimtsüng nung takatiba kibong ka dangi oa sen kwika meshidir agütsütsü ta shia tsük alitsü mepishi, saka teka tazüng kidangi shilang.
Iba nikongdangji tebok mesüngi chiyunger, chirnurtem yipteni yiatok, saka jala rongnung tanabula Chubalabo mejanga moutet. Lai tebu aja aser ashi, “Oba! Oba! Na kechi bilemer? Asen jangpong nung jang tejang kata mait. Onok kaketrejui chi mechiyung koma aotsü?”
Iba aonung pa mejanga moutet aser anepongi 4 ako shi nung saaker kishi lapoki alu. Iba mapang nisung kati par atsü züng nungi, “Odi, Odi” ta jashia pai angashi. Züngya asünung shibar mejangjai rata liasü, saka tesülen iba nisungbaji Imtitoshi, shiba Mopungchuket Arogo nung pai temulung kanga doka liasü, iba nisungbaji ta jangja aru.
Imtitoshii ashi, “Odi, Impur nungi nisung aika tsük alitsü ozü yimtii bushia aru, saka parnok dang ni mayok. Saka nai alitsü bilema lira, ne dangbo tsük Yimchi terbo ayoktsü mulunga lir.” Iba o angashia pa kanga pela aser idangjisa par tanur ajak mesor tanur pezü tsükji abeni Imtitoshir jendangi yok. Iba anepdangji chirnurtem chi mechiyungi kaketrejui ao aser terotu anisüngzük (recess) mapang nung aruagi tetsüi soruchioka aliba chiyung. (‘Kept by the power of God : The story of my life: W. Nokdenlemba).
Laishiba meyipdang mapang talangka agitsüsa akümba kuli.
Tejen Lai meyipba nung W. Nokden den yariteptsü asoshi nübu tajung kar shima parnoki tanga nung yaritepba/metongshiba medeni item ya bendanga meyip; Mayangnokcha- Tenüngsang Ken Tapu 1-50, Rev. Dr. I. Ben Wati- Yob aser Tenüngsang Ken Tapu 51-100, Apok Aier- Yihusua, Rev. Medemkaba- Apijemtsü Shin, Yajen Aier- 2 Chubatem, Tekasosang- Nehimia, N. I. Jamir- 2 Putipuyang, saka parnok ajak tanga mapa nung mazüngi alirtem liasü. Kar sorkar mapa nung ainlen senzüba, kar kaketreju nung tesayur inyakertem, karbo Aolima nung mali asü. Pei mulungsoa khuretji agizükaka pei tata sorkar mapaji mazüngi inyaktsüsa liasü nung bilemba ama yakta merenemtet aser mapangji ojen ao. Tekalen shia aliba kakettem meyipa bener aruba ajakji W. Nokdenlembai jungjunga reprangshiba den Lipok dak alaka tanüngba Tejen Lai kakettemji pai meyip, pai nisung kar nem kaket kar meyiptsü agütsüaka mapang talangka atar maruba agi itemjia paisa meyip.
Külen Mungdang kübok Literature inyaker ka danga mali asü. Ao Mungdang tangatetbaji kaketkeno mapa ajakji Laishiba meyipsang mapa ta pa nem nongloktsü, anungji Laishiba meyiptsüji tesülen toktsütsüsa akümba mapa kar W. Nokdenlembai züluba ‘Ao Baibel Meyipba Otsü’ tapak 6-7 nung yamai shia lir:
1. Tamasa ita ishika Sunday school lesson-tem meyipdaktsü.
2. Tsüngrem külemba kaket.
3. Tekümtet lenmang.
4. Anogo shia taküm kaket.
5. Ano tila teri aika meyipdaktsü.
6. Impur kaketreju nung scripture class agir maliba yong anogo shia subject ka agitsü.
7. Küm shia CBCNEI aser NEICC ajak nung aden.
8. CBCNEI aser NEICC Lit, com, Christian home com, Adult Lit.. ajak agi pongu tashi nung member liasü.
Talisa mapang tali indokbaji Writers Workshop aser seminar nung office shibanga yur hopta ana tashi Jorhat, Guwahati aser Shillong nung oa dena liasü, Mungdangi kaket kechisa menüng; Tanur medemer, Ken kaket menünga aser ajakji reprangshia inyaktsübaji Laishiba meyipsang mapa aküm. Lai meyipba mapang nungsa Ao Baptist Mungdang President pezüben ataa inyakdang nüngdak nung mapang jenti intok. Khenbo Mungdang tenüng nung Assam Chief Minister dangi Shillong tashi yoka liasü.
Aikati W. Nokdenlemba Laishiba amer Impur nung mena kazür amai bilemtsüa akok, ajisüaka Laishiba meyiptsüba mapaji jurila mapa ka amai dang aküm, tenüngbo Laishiba meyiptsü asoshi mapa nungji shim aser itasen iba asoshi agütsü, saka meimlaba mapa jenti nungloktsü. Yamaji kangasa timtem agir iba Laishiba November 29, 1964 nung sayar tanü tashi meyipshijen meyipshia Tsüngrem o ajanga arogo pur len anidagi. Item mapa ajak bilemteta Padmashree W. Nokdenlemba nem tetushi aser akhüm agütsütsüji tim ta shiteter.