Padmavati ken o nung Karni Sena teloki MP school ka raksatsü

Jawra, Aenjeti 16 (Agencies): 2017 küm Sanjay Leela Bhansali indang Padmaavat film ya timtiba jembia liasü aser asenok ajaki iba otsü metetogo. Iba film nung mangatettep adoka tamachi mapa inyakba aser linük nung tatok magütsütepa ken o ya Rajput Karni Sena telok ajanga tenzük. Aser iba ken o temogo südi, ta bilema aliba mapang Sena teloki anu tenzükshiogo.
Tentonü kaket reju ka nung tetsür kati ‘Patmaavat’ indang movie nung aliba ken ka nungi tsüngsangba ajanga nisung telok kati iba anema kiojen raksatsü aser parnok rongnung nisung pezü puogo, ta police temi ashi.
Tetsür kati ‘ghoomar’ shilem agir ghonda asem-pezü ka lir nisung 20-25 shi Saint Paul School-i anüngdang 1:30 ako meta ia kiojen raksatsü tenzük aser Sri Karni Sena busema yimyim ayim, ta Jawra police station nung ketdangser M.P. Parihar-i ashi.
Nisung pezü puogo aser tanüngba nisungtem bushiba mapang lir, ta police-i ashi.
Padmaavat dang ya mezüngbo Padmavati nüngja agütsür liasü, aser iba film tangok tenzükba mapang nungi iba telok ajanga tenokdangba agütsü aser iba sülen censor board ajanga nokdanga liasü. Iba film ya Lichii (December) 1, 2017 nung sayatsü liasü, saka zülubanglu merenemba ajanga thinentsüsa aküm. Padmaavat nung censor board ajanga ‘a’ ojang talila inoka ‘i’ ojang agientsüba sülen sayatsü melaogo.
Karni Sena ama Rajput nunger telok temi iba film anema nokdakba mapang kiojen aser oset aika raksatsüogo aser film yangluri iba otsü raksatsü, ta aitsür. Saka Bhansali-i iba ama aibelen kicha mali, ta shijen ashir.
CBFC ajanga agizükba sülen Padmaavat yanglurtemi Twitter aser Instagram nung nüngja melenshi.
Saka CBFC ajanga temelaba agütsüba Padmaavat nung Rajasthan aser Himachal Pradesh sorkar temulung masü aser state ana nung iba film ya nokdanga lir.
Padmaavat nung Deepika Padukone, Shahid Kapoor aser Ranveer Singh nungertemi tongti shilem agia lir. Iba film ya Aenjeti 25 nung sayatsü aser kasa anogo Akshay Kumar indang PadMan film-a sayatsü lir.