Pai asenok anepalur

Khristan kümer külenbo timtem shisabolu aser lendong-tsüdong kecha malitsü ta masü. Mesüra Tsüngrem dak amangertem asoshibo shisabolu khuret kecha mali ta masü. Alima nung ali tashi nisung shia pei tsüda lemzükba temoatsüa lir aser yamaji shisabolu khureta lir. Ajisüaka, Khristan taküm ka asoshi tepelatsü osang tajung kaji, Tsüngremi asenok khuret tongzüker aser anepalur. 1 Peter 5 tekong 7 nung yamai ashir, “Nenok shisaboluba ajak Pa dak yuang, kechiaser Pai nenok asoshi anepalur.” Asenok ama timtem aser shisabolu agi sünger aliba taküm aser kibongtem atema ibai anisüngzük tulu angudak osang tajung ka lir. Khristan taküm aser kibong nung timtem aser reshikangshi angutsübaji tenyar Peter-i meteta dang liasü. Aji oda, paia pa taküm nung timtem maksü aser reshikangshi aika ajangshi saka pai kodanga tasü mait maküm, kechiyong Yisui pa koda meimer aser anepalur Pai ibaji angateta dang liasü. Tsüngrem tsüngdang asenok shisabolu khuret tulu aser tila kecha bendanga maka, Pai item ajakji ngua dang lir aser asenok nüngdak yari Pai asenok anepalur. Ajisüaka, kenken asenoki shisabolu khuret tilabo Tsüngrem dang meshii asenoksasa akoktsü meranger. Tetezü, kodangsa asenok dangi lendong timtem tulu asenoki mekoktettsüsa arur, idangji dang asenoki Tsüngrem dang ashitsü bilemtetter. Iba jagi kodang asen shisabolu Tsüngrem dangi bener arur, idangjibo shisabolu tila ka agi shisabolu tulu kümadoker alir. Ibaji Tsüngrem tsüngdang asenok mashimalu aser taaktsü mapatem lir. Tsüngremi asenok timtem khuret ajak abentsü mulunga dang lir ser nung asenoki asen shisabolu khuret Tsüngrem dang mashir. Peteri Khristan taküm ka nung shisabolu ajurutsübaji meteta dang aliba agi, nenok timtem toushi jenti liaka, kecha shisa tebulu, item ajakji Tsüngrem nem dang bendakjang ta pai asenok dang jelia shia atar. Ajisüaka, asenok shisabolu Tsüngrem nem yutsütsübaji asen mulung. Asen shisabolu khuret ajak Tsüngremi mulungsua agizüka abentsübaji asen tamang dak keta lir. Asenoki asen menen asoshi Yisu kangki nung angenlok aser maksüdakja reshikangshia merenshi aser shia aru ta amangra, iba tamang jagi asen shisabolu khuret ajak pai tongzüktsü. Asenok shisabolu khuret melen anisüngzük agütsütsübaji Yisu tenangzükba lir. Aji oda, asenok shisabolu khuret abenbaji Tsüngremi ngua dang lir. Pai iba khuretji tongzüktsü mulunga dang lir. Asenoki ibaji mangatetba mesüra mamangtetba agi asenok aiben asenok shisabolu khuret pongdokdak mengui timatemer. Aji oda, pei taküm aser kibong nung Yisu kibur kümdaktsüba tajangzükji shisabolu khuret marutsü ta masü saka shisabolu khuret ajak koktettsüsa asen den teti teyarir tajung Tanüla Temeshii nüka alir aser teti Tsüngremi asenok anepalur.