Pai mulungba metetba

“Iba kuli asoshi onoki nenok asoshi maneni sarasademer. Tanela shisatsü aser tangatetba ajak nung Pai mulungba metetba agi nenok asüngtsü asoshi”. Kolosi 1: 9
Lai omen tulutibaji tanela tenük lapoka alirtem dang Tsüngrem jungkai adoka sayubaji lir. Tanela Temeshi aruba den Laishiba Tsüngrem jungkai adokba tabensa aküm aser Pauli Kolosi nunger atema sarasademba jagi talila ochi jungkai adokba sayutsü atema sarasadem masü. Pai tamangertem ochiba dangi temulung lapoktsü sarasadem.
Sarasadem tongtibangji Tsüngrem asenok dangi jungkai adokba jagi asenok mulung süa alitsübaji lir. Laishibaji Tsüngremi mulungba ta tamangi agizüker. Asenoki Tsüngremji asen mulungjang nung angateta amshira tanga tetuyuba lenmangjia yakta angatettsü aser mapang ajak nung ochishia alitsü. Saka aseni mulungba len dang aotsü jangraa lira Pai mulungba metettsüba aser angatettsuba nung mejangrai akümtsü aser memeteti taküm lenmang nung jemitsü. Asen mulungjang nung Tsüngrem o agi sünga lidaktsura iba jagi asenoki teti Pai mulungba jungkai adoktsütettsü.
Tain tamangerji Tebui mulungba metetba agi sünga alitsü. Kibubai Tebu junga meteta liasü aser ashi, “Ni teti Tebu mulung chidaktsütsü inyaker”. Pai ashi, “Ni Tebuji metet”. Yamaji asenokia tebu Tsungremji junga meteta alitsüla.
Pauli Kolosi 1 :9-ji asen mulung nung amshitsü sarasadem. Shirnoki Pa o azünger parnok asoshi jungkai adokbaji tashi ain lir. Temeshi Kaketji lapokang aser tanü Pa o agi ne mulung süngdakjang.