Paiwang-i Inter State Truck Terminus lapoktsüogo

Dimapur, August 7 (TYO) : Hokolbarnü Transport, IT & Communication minister, Paiwang Konyak-i Nagaland nung mezüngbuba Inter State Truck Terminus (ISTT) lapoktsüogo.
Iba ISTT ya Chumukedima, Dimapur nung sen crore 42 endoka yanglu.
Traffic timtemba, gari onsara akümba aser gari lendongtem atalokba onüktem nung ajemdaker state sorkari Dimapur, Chumukedima nung Inter State Truck Terminus yanglutsü sentong renem, ta Paiwang-i tanü ashi.
Dimapur nung parking facility, ware housing trans-shipment nungertem amala infrastructure tajung maliba ajanga khu abenba truck garitem national highways nung anendener. Iba ya traffic atema dang timtem masü saka driver aser teyaritepertem atema khuret lir, ta paisa ashi.
ISTT lapokba ajanga traffic timtem ajema akümba dang masü saka Kohima lenmanglen Assam aser Manipur-i aoba truck gari anirtem kanga ajangzüktsü. Iba tesem nung driver aser garitem anüktsü atema police security agütsütsü, ta Transport, IT & Communication minister-isa metetdaktsü.
Nagaland nung registered vehicles lakh 3.30 shi lir aser anogoshia lenmang nung gari 15,000 shi senzür. State nung gari timba kümaka gari lenmang majung aser iba ya ajanga Dimapur aser Kohima nung mapang shia traffic jam ajurur, ta paisa ashi.
Paiwang-isa ashiba agi, Nagaland nung shishilembadak tongti Dimapur ya Nagaland atema dang masü saka Manipur atema tongtipang tesem ka lir kechiyong khu abenba gari timbaka iba jila adena senzür. Ano state traffic dak alaka Manipur-i aoba khu garitem ajak asen state adena senzür.
Paisa, ISST temeket nung alirtem dang iba complex ya tongtipang anungji timi anepalutsü aser sensosanger ajaki ISST lendong nungi kümzüka ayutsü aser timi amshitsü tayongzükba agütsü.
Tanü sentong nung mendenji Lithrongla G Chishi, Secretary Transport Department liasü aser Transport Commissioner, H Achumi-i ISTT indang osang tatsüka lemsatepdang, iba complex ya sen crore 42 endoka yanglu aser iba asoshi Urban Ministry, Govt of India ajanga sen crore 14.15 agütsü aser tanüngba crore 28 ji state sorkari agütsü.
ISTT Dimapur nung gari 400 atema parking lots lir aser pollution testing center, security house, security kiosk, parking yard, servicing ramp, external resting shed, ware house for storage of goods, workshop, weighing bridge, guest house, officers quarter aser staff quarters nungertem lir.
Iba complex ya contractor Rokolhou aser T. Tachu & company-i küm asem shi nung yanglu.