Pak & Afghan IS telok lenisang tepsetogo: US

Peshawar, August 13 (Agencies): US mitkartemi nisung memeni anüng nung yimdaktsüba drone tayimtsü amshia, Afghanistan aser Pakistan na nung tentetba Islamic State (IS) telok kongsang lenisang taoba July ita 26 nü tepsetba osang ka Pentagon otongdar, Gordon Trowbridge-i tanü, Honibar nü metetdaktsüogo.
US-i Hafiz Saeed Khan tepsetadokba ajanga IS teloki Syria aser Iraq na nungi tenzüka, Afghanistan aser Pakistan na tonga par yimli yangertsü atema ayuba alizüng nem tetsükdaktsü tulu bener arutsür lir.
Tan Khan tepsetba densema, US-i par drone tayimtsü amshia, tan agi Pakistan aser Afghanistan arrtsülen tesep tenteta alir kiralongrar telok lenisang tanabuba tepseter lir.
US mitkartemi ketdang asüba drone tayimtsü tanga kati  Afghanistan nung tentetba Taliban telok lenisang, Mullah Akhtar Mansour-a taküm May ita Pakistan lushi nung tepsetba osang bushitetogo.
“Afghanistan aser Pakistan na nung tentetba IS telok lenisang, Khan aser par tongti lenirtem US drone tayimtsü kati taoba July ita 26 nü Afghanistan’er Nangharhar province kübok Kot district nung tepsetba kuli nguogo,” ta shia, Afghanistan ambassador, Omar Zakhilwal-ia Khan tepsetba osangji jangjashitsüogo.