Pak Army temi ni junga anepalur: IAF pilot

New Delhi, February 28 (Agencies): Tang Pakistan nunger ket nung alisang IAF pilot, Wing Commander Abhinandan Varthaman-i, Pakistan army temi pa akhümtsübua junga anepalua amshir, ta metetdaktsü.
Yasüng Pakistan Armed Forces indang Inter-Services Public Relations (ISPR)-i video clip ka saya aser ibaji social media nung prokshi.
Iba video nungji Abhinandan-i, “Ni iba ya züngbong sangdonger, aser ni ozü linüki meyipa ao nunga ni jembiba oji memelenshitsü, Pakistan army temi ni junga anepalur,” ta metetdaktsü.
Paisa, Pakistan nunger litsü nung pa indang tayimtsü MiG 21 Bison tsükokba sülen loktii pa dak azük saka Pakistan army temi pa kümzükba atema pelar, ta metetdaktsü.
Yashi pa tayimtsü tsükokba sülen yimdaklirtemi pa longbang, aser pai parnok dang ‘ya India asü Pakistan?’ ta asüngdang.
Pa tsükchir litsü nung, ta pai metetba sülen pai pistol agi yimdaklirtem tsütsü tuyua kilometer tesadang ka shi ajen; iba sülen ayong ka nung pa alanger alidang yimdaklirtem jagi pa menep, aser pa dak azük, ajisüaka iba mapang nungji Pakistan army tem arua pa kümzüka liasü.