Pak Captain, Misbah-ul-Haq-i ICC Test Championship Mace agizükogo

Lahore, September 21 (Agencies): Pakistan captain, Misbah-ul-Haq-i nungtugu International Cricket Council (ICC) Test Championship mace tanü, Bodbar nü agizükogo.
Tan ranking yimya tasen latetshiba sülen Test team rankings nung temaba jenjang angutsüsa par Pakistan telok aniba nüngtem nung ICC Chief Executive, David Richardson-i Misbah nem takokba ajokji amoktsü.
“ICC Test Championship takokba ajok ya tangar dak alia, takok ngua asayaba temaitsü lir aser Pakistan teloki iba takokba agizüktsü temsüa lir. 2009 küm nungi tenzüka pei asayadak series asayatsü maongka monguaka, Pakistan teloki Test rankings nung World No.1 akümtsü jenjang tajung ajangzüktetba atema kanga pelar,” ta Richardson-i metetdaktsü.
“Pei asayadak iba nungtugu takokba ajok agizüktsü maongka anguba atema kanga pelar. Iba asayadak masayatettsüsa jenjang ajuruba atema kanga sasar saka tarutsü anogotem nung temelenshi lia, Pakistan nung international cricket tanaben asayatsü maongka angutsü imlar,” ta Pakistan kübok Lahore nung tentetba Gaddafi Stadium nung takokba ajok agizükba sülen Misbah-i metetdaktsü.
“Kü lenisüba kübok ICC takok marok agizüktsü maongka angubaji pungmang ka asangsang nung ataloker lir. Iba takokba ajok agizüker international captain 9 buba akümtsü maongka anguba atema kanga pelar. Ozü asayartemi taoba küm 5 tashi bendanga agüja asayaba ajanga tan takokba ya angur lir,” ta pai shisem.
Australia, England, India aser South Africa sülen anidaka, Pakistan ya ICC championship takokba ajok agizüker telok 5 buba akümer lir aser Australia nunger Steve Waugh, Ricky Ponting, Michael Clarke & Steve Smith; India nunger MS Dhoni; England nugner Andrew Strauss aser South Africa nunger Graeme Smith & Hashim Amla na nunger sülen anidaka, Misbah iba nungtugu sempet agizüker international captain 9 buba akümer lir.