Pak, China, US & Afghan nungeri yimjung senden amener

Pak, China, US & Afghan nungeri yimjung senden amener

Afghan sorkar anemba Taliban teloki tongpang rarabaren anena sorkar den yimjung tezüngzüktep agitsü ajungshitsü nükjidong nung Pakistan, Afghanistan, China aser US lenirtemi Kabul yimti nung senden ka amenba noksa nung angur. (Kabul, January 18)

Kabul, January 18 (Agencies): Afghanistan, Pakistan, China aser United States (US) nungi lenirtemi Afghanistan yimtiba, Kabul nung tongti yimjung senden ka tanü, Hombar nü menogo.

US-i aniba alima teloktep mitkartemi nungitba Afghan sorkar aser Taliban telungpur telok na tsüngda taoba küm 15 tejaklen nungi tenzüka mangatettep adoka tongpang raraba anenja yimji yimjung tensa bener arutsütsü tasa aser lenmangtem bushitsü nükjidong nung linük 4 nungi lenirtemi tanü senden amenba osang jangjaogo.

Bendang mitkartemi Afghanistan toktsütsü tenzükba sülen, Kabul sorkar jireptsütsü nükjidong nung Taliban telungpurtemi yaküm, 2015 küm nungi tenzüka par amakba maparen taoba mapang nungi tesashiba inyaktsü tenzüka lir.

Ajisüaka, tan amenba senden nung US-i aniba alima mitkartemi 2001 küm nungi tenzüka raraba Taliban telokibo shilem agitsü memulungba osang jangjaogo.

Pakistan-i ayonger külen Islamabad nung Kabul sorkar aser Taliban telok na tsüngda yaküm amenba yimjung senden tanaben tenzükshitsü nükjidong nung tan senden ya ayongba osanga jangjaogo.

“Taliban teloki tan senden nung shilem agitsü memulungba ajanga parnoki yimjung nung alitsü memulungba kuli angur,” ta Afghan Foreign Minister, Salahuddin Rabbani-i tanü senden nung metetdaktsü.

“Tan senden amenba ya ajak asoshi kanga dang tongtipang lir. Ajisüaka, tan senden amenba ajanga dangbo teti asoshi yimji yimjung bener marutsütettsü,” ta pai shisem.

“Linük 4 tashi nungi lenirtemi tan Kabul nung senden amenba ya yimjung alitsü mera tongti ka agir lir. Ajisüaka, Taliban teloki tang Afghan mitkartem madak takok ngua lir anungji, par telok o mitkar na sako jenjang ka maküm tashibo yimjung senden takok ngua mementettsü,” ta South Asia Analysis Group (SAAG) nung director, S. Chandrasekharan-ia metetdaktsüogo.

“Ozü teloki yimjung senden nung shilem agitsü mulunga lir. Ajisüaka, kasa senden nung Afghan senso meyirijang jenti tepseter US telok densemba yong ozü teloki iba senden nung shilem magitsü lemtetogo,” ta Taliban telokia par website ajanga taoba Honibar nü metetdaktsüba osang jangjaogo.

You must be logged in to post a comment Login