Pak High Commission ketdangser troki India toktsüogo

New Delhi, November 02 (Agencies): Pakistan nunger ketdangser kati itangitba mapa inyakba atema India nungi mintokba sülen India-Pakistan tesentaktep mejungi lia tanü Pakistan High Commission ketdangser troki New Delhi toktsür par linüki meyipa ogo.
Pakistan High Commission osang ajanga ashiba agi, mission ketdangser trok rongnung kari India toktsür ogo aser kari toktsütsü, ta ashi.
“Iba ama tensa ka nung meinyaktettsüsa akumba sülen iba telemtetba agi. India sorkari ozü ketdangsertem amokmerener. Anungji iba ama tensa ka nung iba linük nung maneni lia mapa inyaktsüji tamakoktsü,” ta kasa osang ajanga ashi.
Parnoki ashiba agi, India toktsür Pakistan-i meyipa aortem rongnung commercial counselor, Syed Furrukh Habib aser first secretaries- Khadim Hussain, Mudassir Cheema aser Shahid Iqbal nunger lir.
Tawa India-i Pakistan nunger ketdanger Mehmood Akhtar-i itangitba mapa inyakogo ta tai tonglokja ghonda 48 tsüngda India toktsür aotsü tuyuba sülen Pakistan-ia Islamabad, nungi India High Commission ketdangser ka meintok.
Ano külen Pakistan media ajanga India nunger ketdangser anati tim masüba mapatem nung shilem agir ta jungkai adoktsüba sülen India-i Islamabad nung aliba Indian high commission ketdangser ana meyipa arudaktsütsü lemtetogo.
India nunger ketdangser Rajesh Agnihotri aser Balbir Singh na atema Pakistan-i sangdong magütsüdang India-i sorkar anaji agientsü.
Ketdangser ana jangjaogo aser tena noksaji tanü Pakistan nunger TV news channels balala nung aiben sayaogo.
Geo TV ajanga, Agnihotri ji RAW den tesentaktep lir aser Singh-i Intelligence Bureau (IB) atema inyaktsür, aser tanati Pakistan nung ketdangsüba menden tim masüba nung amshir, ta tai tongloktsüogo.
Geo TV ajangasa, Singh-i Pakistan nung telungpurtem network ka ketdangser aser high commission ketdangser, Surjeet Singh-a iba network nungji shilem lir, ta tai tongloktsü.