Pak Hindu nunger kiojen alitsü, account lapoktsü melatsü

New Delhi, April 17 (Agencies): Pakistan nunger Hindu yimsü amanger India nung alirtem aser Long Term Visa nung alirtem nem kiojen alitsü, bank account lapoktsü aser PAN den Aadhaar cards atema temelaba agütsütsü asoshi Ato kilonser, Narendra Modi’er sorkari inyakdar.
BJP-i aniba NDA sorkarisa Pakistan nunger Hindu amangertem India senso agitsü atema sen 15,000 agia aliba nungi sen 100 dang agitsü atema inyakdar.
Pakistan, Bangladesh aser Afghanistan nungi Hindu amanger refugees kwi India nung jenoka telitak’ar mejangjar, ajisüaka Hindu aser Sikh nunger timba ser India nung refugees lakh ana shi lir ta asadangteter.
Pakistan nunger Hindu refugee 400 shi Jodhpur, Jaisalmer, Jaipur, Raipur, Ahmedabad, Rajkot, Kutch, Bhopal, Indore, Mumbai, Nagpur, Pune, Delhi aser Lucknow yimtitem nung lir.
“Pakistan nungi Hindu nunger Long Term Visa nung India nung alirtemi timtem ajangshibaji Centre sorkar maneni asadanger. Parnok khuretem tera pungbatsütsü atema parnok nem maongka balala agütsütsü bilemdar,” ta Home Ministry osang ka ajanga metetdaktsü.
Item maongka rongnung- Reserve Bank of India dang nungi temelaba meshir bank account lapoktsü melatsü, kiojen alitsü, mapa inyaktsü, driving licence aser PAN agütsütsü densema lir.