Pak Hindus 431 nem long-term visa agütsü

New Delhi, October 29 (Agencies): Pakistan senso Hindu nunger 431 nem India sorkari long-term visa agutsüogo, aser ibaji ajanga parnoki PAN aser Aadhaar cards yanglutettsü, iba den külemi parnoki kiojen alitettsü, ta home ministry ketdangser kati metetdaktsü.
India aser Pakistan na tsüngda tesendaktep mejungi liaka Narendra Modi-i aniba sorkari Pakistan, Afghanistan aser Bangladesh nung reshikangshi tia ajuruba minority tem nem India nung tejenokdak agüja arur.
Osangbener den jembidang Ministry ketdangseri-i, “Ministry of Home Affairs-i taoba ita Pakistan nunger senso 431 nem long-term visa agütsüogo. Parnokji Pakistan nungi minority tem lir,” ta metetdaktsü.
Centre sorkar-i Pakistan, Afghanistan aser Bangladesh linüktem nungi India-i aruba minority tem – Hindus, Sikhs, Buddhists, Jains, Parsis aser Khristantem nem long-term visa agutsür, parnoki parnok kibong lishitsüsa ki tila alitsü melar aser pei sasa mapa bushia inyaktsü melar. Parnok nem PAN cards, Aadhaar number aser driving licences-a agutsür, mapa inyaktsü melar, aser sademsadema senzütsü melar, iba den külemi long-term visa kulikaketji nisung kati ka nem agüja lemsatepa amshitsü melar.
Tang Pakistan nungi aruba nisung 431 jagi Reserve Bank of India dang nungi jelia temelaba memeshiyonga bank accounts lapoktettsü.
Pakistan nungi kiralongrartemi Uri nung Army station amakba, Indian Army-i PoK nung kiralongrartem amakba aser Jammu & Kashmir arrtsülen Pakistan sepaitemi mapang shia ceasefire ozüng alema inyakba ajanga linük ana tesendaktep tamajungba akumer.
Ano Pakistan lenirtemi Hizbul Mujahideen commander, asür Burhan Wani pusema jembiba ajanga linük ana tesendaktep tamajungba akum. Wani ya 2016 küm July ita nung Indian army temi khaseta liasü.
Taküm September ita nunga home ministry-i Pakistan, Afghanistan, China aser linük kar nungi nisung 4,000 indang visa applications agizüka liasü.
September ita nung visa application 6,025 agutsü, aser iba nungjagi visa 4,057 agizük, ta home ministry ketdangser kati ashi.