Pak-i 2014 küm Peshawar School amaker 4 tashi tepseta merenshir

Islamabad, December 02 (Agencies): Pakistan-i Peshawar school amakba ken o nung aitsüba sülen aibelener nisung 4 tashi lisü agi alenseta tasüba temerenshi tanü Bodbar nü agütsüogo.

Mitkartemi Peshawar yimti nung tenteta ketdang asüba school nung Taliban telungpur teloki lendong atalokdaktsüba ajanga kaketshir 134 aser tesayur o mapa inyaker 16 tashi tepsetba osang bushiteta lir.

Peshawar school nung lendong ataloktsürtem yaria parnoki yaküm atalokdaktsüba lendong nung tongti shilem agia aibelen ta nangzükba sülen tanü tepseta merenshir 4 den külemi, kasa ken o nung aibelener 2 nem tasüba temerenshi agütsütsü asoshi mitkar lenirtemi taküm August ita o bendang agüja liasü.

Yaküm amakertemi school kilung nung tentetba auditorium nung sentepa alir kaketshir dak injang kalokja amakba sülen parnoki classroom shiai iya takdang telung nung alirtem dak injang kalokja lendong atalokdaktsütsü tenzük saka Pakistan mitkartemi tatem nung amaker ajunga kaset.

Mitkartemi par telok arishitsü tenzükba atema kepzüka Peshawar nung lendongji atalokdaktsü ta Pakistan nung tentetba Taliban teloki tesülen lendong atalokdaktsüba atema tenüng agia metetdakja liasü.

Iba amakbaren nem tapet telangzüba agüja, Pakistan Ato Kilonser, Nawaz Sharif-ia taoba mapang, 2008 küm nungi tenzüka agienba aibelener nem tasüba temerenshi agütsütsü temerenshi tanaben mapa küma inyaktsü renem.

Iba mapang nungi tenzüka tanü tashi nung Pakistan-i aibelener nisung noklang aika tepseta merenshiba osang bushiteta lir.