Pak-i Afghan refugee-temi ajuruba timtem bentettsütsü ajungshir: UN

Afghanistan-i tanaben meyipa yokba jakdang Pakistan kübok Peshawar nung tentetba United Nations High Commissioner for Refugees (UNHCR) office kimalen mena alir Afghanistan refugee nisungtem rong nung tila tanur ajunger aliba Afghanistan refugee-tsürtema densema aliba noksa nung angur. (Peshawar, February 27) 

Geneva, February 27 (Agencies): Pakistan sorkari par linük jenoka alir Afghanistan nunger refugee nisung million 2.5 dak temai ajurushia aliba timtem bentettsütsü tajungshiba olen ka United Nations (UN)-i metetaktsüogo.
Pakistan nung jenoka alir Afghan refugee nisung million 2.5 dak tema indang tenüng mezüluoki aliba aser tenüng züluoka alirtem indang card-tema expire süadokba osang bushiteta lir.
Syria, Iraq aser Afghanistan nung lendong kanga sashia atalokba ajanga pei talidak toktsür refugee nisung meyirijang jenti Europe nung jenoka alitsü merangba ama, Pakistan nunga refugee nisungtem, talisa Afghan refugee nisung million dak tema jenoka aliba osang bushiteta lir ta UN kübok tentetba refugee agency, United Nations High Commissioner for Refugees (UNHCR)-i metetdaktsüogo.
Pakistan nung mapang tatsüka jenoka alitsü asoshi Pakistan sorkari refugee nisung million 1.5 dak tema nem yaküm, 2015 December ita agütsüba registration card expire asüba sülen parnok Pakistan nung maneni ita 6 tashi jenoka alitsü asoshi sorkari melaba osang jangjaogo.
Ajisüaka, expire sür aliba card abenba Afghan refugee nisungtemji police ketdangsertemi merenshiba aser registration malir refugee nisung million 1 shi sorkar ketdangsertem nungi timtem jenti ajuruba osang bushiteta lir.
Refugee nisungtem den sentakba onük ya Pakistan cabinet langbang atongba osanga jangjaogo.
“Pakistan sorkari par linük jenoka alir refugee nisungtemi anogoshi ajuruba timtem bentettsütsü asoshi sorkar lenirtem den tanen makai tejembidak lir,” ta UNHCR nung Assistant High Commissioner, George Okoth-Obbo-i osang jangjashitsü.
“Pakistan sorkari iba khuret ya tekaratiba mapang nung bentettsütsü tamang akar,” ta paisa ashi.