Pak-i Biometric Passport agütsütsü alizüng ayur

Islamabad, May 19 (Agencies): Pakistan-i sangküm, 2017 küm nungi tenzüka, par nüburtem nem biometric passport agütsütsü alizüng ayuba osang ka Pakistan Interior Ministry otongdar, Sarfaz Hussain-i tanü, Brehostibar nü sangoktsüogo.
Pakistan nüburtem ozüng alema bendanglen talisa, Europe aser Gulf linüktemi tashiyim agi anir aoba azüoktsü nükjidong nung nüburtemi linük ka nungi linük tanga kati aotsü temeten agütsübaren, passport biometric kümdaktsütsü alizüng ayur lir.
South Asia nung tentetba Pakista linüki ajurushiba migrant nisungtem aser ozüng alema nisung shibelenba maparen azüoktsü aser kasaji nokdangtsü senden ka Federal Investigation Agency (FIA) ketdangsertem den taoba hopta amenba sülen Pakistan Interior Minister, Chaudhry Nisar Ali Khan-i par nüburtem nem biometric passport agütsütsü onük agizükba osang jangjaogo.
“Sangküm, 2017 küm nungi tenzüka, ozü nüburtem nem biometric passport agütsütsü renemogo,” ta Hussain-i nenshia ashi.
Pakistan-i taoba mapang, 2004 küm nungi tenzüka par nüburtem nem kol balalai züngtetba computerised passport agütsütsü tenzük saka item passport-tem nung passport abener indang osangtsüsang, biodata densemba mirochip inoksema mali.
“Pei biodata densemba microchip inoksemba biometric passport agütsüba ajanga ketdangsertemi ozüng alema yangluba passport bushitettsü aser ibaji ajanga ozüng alema inyakertemi nisung shibelenbaren putettsü,” ta Hussain-i osang jangjashitsü.
Islam tamangba yimsü nung ajemdaker tentetba telungpur aser kiralongrartemi Pakistan nung lendong tsüngdong kanga sashia atalokdaktsüba den külemi, nüburtemi sensak tia ajuruba ajanga Pakistan nübur meyirijang aikati par Pakistan toktsür Europe aser Middle East linüktem nung jenoka lia, par taküm jenjang tajungba akümtsü merangba osang bushiteta lir.
Aji oda, nüburtem dang par taküm jenjang tajungba kümdaktsütsü nangzüka, ozüng alema inyakertemi Pakistan nübur meyirijang aika ozüng alema shibelena bendangleni anir aoba osanga bushitetogo.
Tanü tashi nung nisung shibelenertemi Pakistan nübur kwi shi küm shia shibelener iba osang mejangjateti lir saka Spain, Greece, Turkey, Oman aser Iran nungi Pakistan senso 66,427 tashi 2013 küm Paksitan-i meyipa yokba osang bushitetba osang ka United Nations (UN)-i metetdaktsüogo.
2015 küm nungi tenzüka migrant aser refugee nisung million ka dak temai Europe nung jenoktsü merangba osang bushiteta lir aser item migrant aser refugee nisungtem shilem noklang nung shilem 3 shi Pakistan sensotem aiba osang ka UN’er Refugee Agency-ia metetdaktsüogo.