Pak.-i F-16 tayimtsü alitsü atema US-i latettsüba magir

Islamabad, May 8 (Agencies) : Pakistan Foreign Secretary Aizaz Chaudhry-i, “Linük atema tanü asüng tensa den putepa rara dang amshiba tayimtsü F-16 nüngdaker. Iba tayimtsü ya tang Pakistan nung kiralongrar den raratsü atema kanga nüngdaker ajisüaka tayimtsü alitsü asoshi US-i latettsüba onoki magir,” ta ashi.
Osangbenertem den jembiba mapang pai, linük nung mongintem aser shishilemba mapa nung takotettem Honibarnü Islamabad nung senden ka amen aser iba mapang F-16 tayimtsü alitsü atema kecha telatetba-a menüngdak kechiba süra Pakistan-i item tayimtsü ya kiralongrartem den raratsü atema dang amshitsü ta parnok jembitep, ta ashiba Dawn online osang ajanga metetdaktsü.
Item tayimtsü alitsü atema sen ajak Pakistan-i parnok senpong nungi agütsütsüla, ta Pakistan atema sen tesadang ka agüja yaritsü renema jembir aliba US Congress-i nokdangba sülen US State Department-i tesüiba hopta tetenzüklen metetdaktsüogo.
Ajisüaka tang ya Pakistan-i US den congress-i nokdangbaji agiener mezüng linük ana bangjemtepba ama tayimtsü aliba sen tesadang ka US sorkari aser tesadang ka Pakistan-i agütsütsü atema olemtep tagidak lir, ta Chaudhry-i ashi.
Pakistan-i US dang nungi raradang amshiba tayimtsü F-16 ti (8) alitsü atema US den renema jembir liasü.
Mezüng iba tayimtsü alitsü asoshi jembidang F-16 ti atema sen million dollar 270 ang Pakistan senpong nungi agütsütsü aser tanüngba senji US Foreign Military Financing (FMF) fund nungi agütsütsü bangjemtep.
Item tayimtsü ti alitsü atema linük senpong nung sen peria mali ta US dang shiogo aser US-i linük ana mezüng jembiba ama meinyakra Pakistan nüngdak ataloktsü asoshi raradang amshiba tayimtsü tanga ang kar alitsüsa akümtsü, ta Pakistan-i shishiogo.
Al Qaeda lenir, asür Osama bin Laden aliba tesem tuyua US den yariteper Shakeel Afridi atema Pakistan sorkari tepuokdak ayutsü lemtettsüba tsütsü telemtetba tajung kecha magütsüba aser Pakistan nuclear sentong tsübuba ajanga US Congress-i parnok dang iba tayimtsü ayoktsü arendaker asütsü südi, ta osang kar ajanga metetdaktsü.