Pak-i India anema rara jazüker: Rajnath

Lucknow, September 26 (Agencies): Jammu & Kashmir nung aliba Line of Control nung Pakistan-i ceasefire temzüng alema maneni inyakba dak sentakba nung tanü Union Home Minister Rajnath Singh-i, Pakistan-i India anema rara jazüker aser iba ya linük atema tayongzükba tulu ka lir, ta ashi.
“Pakistan-i India anema odi-odia mesüaka rara jazükogo aser iba ya asenok atema tayongzükba tulu ka lir. Iba atema onoki linük aikati pusemtsü ayongogo aser tanga linüktem den-a mera agidar,” ta tanü Lucknow nung pai ashi.
Tawa UAE linük den kiralongraba anema raratsü aser intelligence osang lemsateptsü bangjemba ya takok ka lir, ta paisa ashi.
India security tensa onük nung senden ka amenba mapang Singh-i, Pakistan aser China den India arrtsü ya kanga tasak aser tebenja onük ka lir, aser ibaji temelungjang nung yua nüngdak apir security mera agitsüla, ta ashi.
Nepal aser Bhutan na den arrtsübo süngjema lir aser tebilemtsü kecha mali saka Bangladesh aser Myanmar na denbo tebilemtsü lir, ta paisa shisem.