Pak-i India nunger inyakyim nung tiyongi aitba anentsüla: MEA

New Delhi, August 09 (Agencies): Hokolbarnü Narendra Modi-i aniba sorkari Pakistan dang India nunger inyakyim nung tiyongi aitba anentsüla, aser Jammu & Kashmir nung Arrla 370 agienba nung ajemdaker linük ana tsüngda Samjhauta aser Thar Express train services anentsüba telemtetbaji meyipa reprangshitsüla, ta metetdaktsü.
Tanü New Delhi nung osangbenertem den jembidang MEA otongdar, Raveesh Kumar-i, “Pakistan-i agiba telemtetbaji parnok kijai agiba telemtetba lir. Onoki parnok dang iba telemtetba meyipa reprangshitsü metetdaktsüogo. Tang Pakistan-i inyakba ya amokmeren tensa ka lir. Pakistan-i chichiba tensa agizüktettsüla aser tanga linük inyakyim nung tiyongi aitba anentsüla,” ta metetdaktsü.
Pakistan-i linük ana tsüngda senzüba Samjhauta aser Thar Express train services anentsü atema telemtetba agiba dak sendakba nung MEA otongdari iba o ya jembi.
Pai ashiba agi, Jammu & Kashmir nung Arrla 370 agienba ajanga Pakistan jashir. J&K nung terenlok mapatem inyaktsü atema sentong lir, kechiyong joko Islamabad-i kiralongra meinyaktettsü mesüra Kashmir nüburtem dang yazü mejembitettsü.
Paisa, “J&K dak sendakba onük ajakji linük telung inyakyim lir aser India onük lir. Onoki Pakistan nem ibaji angatetdaktsüner,” ta ashi.
MEA-i, ”India temzüng ya liasü, lir aser teti alitsü. Iba ya linük ka onük lir. Arrtsü adener tiyongtsüi aita inyaktsü merangbaji kodanga takok mangutsü,” ta metetdaktsüogo.
MEA-isa, “Yashi Pakistan-i telemtetbatem sangdongba atema India sorkari sasar, aser parnok dang item telemtetba reprangshitsü mepishir,” ta metetdaktsü.