Pak-i kahzüka yokba Drone ji shinga danga mayok: China

Beijing, July 22 (Agencies): India nunger indang nisung mamenba tayimtsü (drone) kati temzüng alema litsü telungi aita Line of Control (LoC) anasa anüngleni nungi noksa agiogo, ta Pakistan-i July 16 nü India nem tai tonglokja liasü saka iba tayimtsü yangluba China firm-i, Pakistan Line of Control (LoC) nung kahzüka yokba drone ji tanga linük sorkar shinga danga mayok, ta metetdaktsüogo.

Chinese drone yangluba company, DJI-i, sorkartemji parnok indang direct customer tem masü, ta Global Times osang ajanga metetdaktsü.

Pakistan-i India dang tejak metentettsü kaji, Chinese official media, ruling Communist Party of China (CPC)-i achayangba People’s Daily Online ajanga, phantom 3 drone ji China nung DJI-i yanglur, ta metetdaktsüogo.

Iba tayimtsü ya July 15 nü Pakistan army temi kahzüka yok aser iba tayimtsüji India nungi lir ta tai tonglokja liasü.

Ano India nunger Foreign Secretary S Jaishankar-ia, iba tayimtsüji Indian defence force temi yangluba masü ta metetdakja liasü.

Chinese official media ajanga iba osang jangjashitsüba ajanga Pakistan aser China na tesentaktep nung terabo kongshitsü südi.

DJI ya 2006 küm Frank Wang-i tentetba Chinese technology company ka lir aser iba headquarters ya Shenzhen, Guangdong nung lir.