Pak-i kiralongra pusemba atema India, Afghanistan-i aitsü

Amritsar, December 04 (Agencies): Deobarnü Afghanistan Tir, Ashraf Ghani-i Pakistan-i kiralongra pusemba aitsüba den külemi Ato kilonser, Narendra Modi-ia South Asia region nung kiralongra ajanga yimjung raksatsüba atema tebilemtsü kaa jembiogo.
Pakistan ketdangser, Sartaj Aziz lia Ghani aser Modi nati jembia liasü.
Tanü Punjab kübok Amritsar yimti nung 6buba ‘Heart of Asia conference – Istanbul Process on Afghanistan’ sentong nung Afghanistan Tir, Ghani-i, par linük nung kiralongraji Pakistan ajanga lir, ta odiodia jembi.
Ano külen Modi-i linük tenüng metetshiaka pai, kiralongrar pusemer, jenokdaktsür, training agütsür aser senotsü agi yarir linük anema alima linüktemi inyaktsüla, ta ashi.
Afghan Tirisa, Pakistan sepaitemi kiralongrartem bendangshidanga rarar ta ashiba den külemi, kiralongra nokdangtsü atema Pakistan-i kechi inyak?, ta asüngdang.
Ghana-i ashiba agi, “Linüki yaria jenokdaktsübaji Pakistan nung lir. Taliban mapatong nung tongtibang nisung rongnung Kakazada densema lir aser tawa pai, parnok Pakistan nung tejenokdak melira parnoki ita kata melitettsü ta shiogo.”
Pai Pakistan foreign policy tongti, Aziz dang, “Kiralongrar linüki (Pakistan) maneni kiralongrartem yarira sen kwi ka yoka onok yariaka rara agi teraksa bener arutsür aliba linük, Afghanistan nung yimjung malitsü,” ta ashi.
Pakistan-i Afghan nem US sen million 500 agütsütsü nangzükba atema Ghana-i pelaba lemsatep ajisüaka pai, “Wb. Aziz, iba sen ya kiralongra azüoktsü atema amshiba kanga tajungba süla, kechiyong yimjung medenibo sen kwi teyari arudir aruaka ozü nübur nüngdaktem mataloktsü,” ta ashi.
“Yaküm Afghanistan nung nisung timba asü. Iba ya tagizüktetla masü. Tang tashi kari (linük kari) kiralongrartem jenokdaktsür,” ta paisa ashi.
Ato kilonser, Narendra Modi-ibo Afghan lenir amaji odiodia Pakistan maitsü saka ajaki longjemer kiralongra anema raratsü ayongzük.
“Kiralongra networks tamakok ngudaktsütsü atema asenoki longjemer inyaktsüla. Yimjung pusemba kija jagi teperi masü. Iba denji külemi mapa-a adentsüla,” ta Modi-i ashi.
“Afghanistan nung kiralongra anema ola madokba aser meinyakba ajanga kiralongrartem dang tasü itshitsü,” ta paisa ashi.
Iba conference nung linük 20 dak tema nungi lenirtem aden. Iba senden ya Afghanistan nung küm aika raraba atema lenmang ka bushitsü nükjidong nung akar.