Pak-i kiralongrar ajunga den raratsüla: US

Washington, July 14 (Agencies): Pakistan linüki kiralongrar telok ajunga den raratsü aser kiralongrartemi tentetba tesep ajunga makdoktsü tajungshiba olen ka US sorkari metetdaktsüogo.

“Pakistan sorkari kiralongrar anema raratsü nung tongti mera agiba atema kanga pelar. Ajisüaka, par linüki kidangsüa aliba tesemtem nung tentetba kiralongrartem densema, par lushi telung nung tesep tentetba kiralongrar telok ajunga makdoktsü nungdaka kümogo. Yamaji inyakba ajanga dang par linük nung tensa junga alitsü,” ta US State Department Deputy Spokesman, Mark Toner-i metetdaktsü.

“Pakistan mitkar lenisang, General Raheel Sharif-i tan July ita 6 nü metetdaktsüba ama, par miktartemi kiralongrar teloktem den raraba aser Pakistan lushi nung par tesep metentetdaktsüi nokdangtsü maparen inyakba kanga pela agizüker.  Ano, ozü US-ia kiralongrartem anema raratsü nung Pakistan maneni nungita yaritsü mulunga lir,” ta Toner-i shisem.