Pak-i kiralongrar jenokdaktsüba jungkai adoktsütsü atema senden ka amentsü

New Delhi, Feb 23 (Agencies): Pakistan-i kiralongrartem pusemba jungkai adokdaktsütsü atema Union Defence Minister, Nirmala Sitharaman den sepai service asem nungi tongtitem senden ka amentsü.
Pakistan nung amenoka aliba kiralongrar telok, Jaish-e-Mohammed-i taoba hopta Pulwama nung Central Reserve Police Force personnel (CRPF) sepai 40 tepsetba sülen alima linüktem nem Pakistan sendokdaktsütsü atema India-i maparen tenzükba mapang ka nung iba senden ya amentsü.
February 25-26 anogotem senden nung Defence Minister, Sitharaman den service 3- Navy, Air Force aser Army nungi tongtitemi Pakistan-i kiralongrartem jenokdakja pusemba osang alima matsüngdang jungkai adokdaktsütsü atema Defence Attaches (DA) den jembitsü.
“DAs dang Pakistan-i India anema inyakba shilem jungkai adokdaktsütsü atema asüngdangtsü aser Pulwama amakba nung shilem agiba indanga asüngdangtsü,” ta sorkar osang ka ajanga metetdaktsü.
Pulwama nung sepaitem amakba sülen India-i Pakistan nem agüja aliba maongka “Most Favoured Nation” agienogo. Kasa senden nung MEA nungia ketdangsertemi shilem agia jembitsü.