Pak-i NSA senden thinentsübaji tesasatsüka: Rajnath

Lucknow, August 23 (Agencies): Tanü Lucknow nung Union Home Minister Rajnath Singh-i, Pakistan-i NSA senden thinentsübaji tesasatsüka ta shiogo.
Singh-isa, tarutsü nung linük ana tsüngda senden amentsüji kidanger linük (Pakistan) dak dang keta lir, ta ashi.
India NSA, Ajit Doval aser Pakistan NSA Sartaj Aziz na tsüngda senden amentsü aliba sentong Pakistan-i thinentsüba sülen anogo ka lir tanü Lucknow nung sentong ka tembangba sülen osangbenertem den jembidang Singh-i, “India-Pakistan tsüngda NSA-level senden thinenbaji tesasatsüka lir. India-i ken o jembiner,” ta ashi.
Iba senden thinenba atema Pakistan-i India nem tai tongloktsüba dak sentakba nung Home Minister Singh-i, “Iba senden ya India-i masü saka Pakistan-i thinen,” ta ashi.
“Ato kilonser Narendra Modi aser Pakistan Ato kilonser Nawaz na senden amenba mapang (July ita Russia, Ufa yimti nung) telemtetba onük nungi Pakistan-i masetshitsüla liasü,” ta paisa ashi.
Aziz-i Kashmiri separatist lenirtem majurutsüla ta India-i ashishiba atema Pakistan-i India aitsüba dak sentakba nung Singh-i, “NSA-level senden nung tasembuba party ka malitsüla. Iba ya NSA level senden ayongzükba dang liasü,” ta ashi.
Tarutsü nung India-i koba mera ka agitsü ta asüngdangba langzüdang Singh-i, iba telemtetbaji Pakistan dak dang aket, ta ashi.