Pak-i Paris Climate tezüngzüktep mapa küma inyaktsü nangzükshir

Islamabad, November 11 (Agencies): Pakistan linüki yaküm, 2015 küm agiba Paris climate tezüngzüktep mapa küma inyaktsü nangzükshir ta tezüluba nung United Nations (UN) nung benokogo.
UN tesepti, New York yimti nung sentong tajung ka agia, Pakistan’er Permanent UN Representative, Maleeha Lodhi-i Pakitan Tir, Mamnoon Hussain-i pa maitsü ajenoktsüba tenangzükbaji UN nung benoka liasü.
Tan tenangzükba agiba sülen Pakistan ya taoba mapang agiba climate tezüngzüktep mapa küma inyaktsü nangzükshir alima linük 104 buba akümer lir.
Alima lenirtemi France yimtiba, Paris nung yaküm December ita tongti senden ka mena, alima tali tatsükba akümba aser iba ajanga alima tsüngsang mupong balaka küma melenshidaktsübaren azüoktsü tezüngzüktep otsüsütsüsa agia liasü.
Iba tezüngzüktepji agiba sülen taküm, 2016 October ita 5 nü tashi nung alima linük 55 tashi par tenangzükba mapa küma inyaka, miim tango aketba greenhouse gas adokdaktsübaren tajemba kümdaktsüba osang bushiteta liasü.
Parnoki tezüngzüktep agiba ajanga alima tali tatsükba akümbaren tajemba agi centigrade 2 agi tajemba kümdaktsütsü alizüng yua lir.