Pak-i shisa maka o mejembitsüla: Rijiju

Guwahati (Assam), April 08 (Agencies): Kiralongrartemi Pathankot nung air base amakba ken o Pakistan nunger JIT-i bushisüngdangba dak sentakba nung yashi Pakistan High Commissioner, Abdul Basit-i jembiba o ashishia Hokolbarnü Minister of State for Home Affairs, Kiren Rijiju-i, item ama o jembibaji ajanga Asia nung kidanger linük ana tesentaktep tajungba makümtsü, ta ashi.
Osangbenertem den jembidang Rijiju-i, “Pakistan High Commissioner to India-i kechisa jembiogo, ibaji khenyongi tai. Pai jembiba oji ajanga linük ana tsüngda tesentaktep tajungba makümtsü. Abdul Basit-i jembiba oji onoki aitsür,” ta ashi.
Paisa, “Pai item ama o mejembitsüla, koba ajanga linük ana tesentaktep nung mejungi kongshitsü. Pai shisa kaa jembitsüla. Ministry of Foreign Affairs-i sangdongbaji ang shitak,” ta ashi.
Pakistan ketdangser, Basit-i India aser Pakistan na tsüngda yimjung ken o anena atar ta jembiba aija Ministry of External Affairs (MEA) otongdar, Vikas Swarup Swarup-i, “Osangbenertem senden nung Pakistan nunger Foreign Ministry otongdar, Nafees Zakaria-i, linük ana tsüngda yimjung ken o atema tangatettep nung tongtepratepa inyakdar ta shiogo,” ta metetdaktsü.