Pak-i UN kübok NSG züngsem akümtsü akhanger

Islamabad, August 25 (Agencies): United Nations (UN) kübok tentetba Nuclear Suppliers Group (NSG) tentet nung züngsemtsü takhangba olen ka Pakistan sorkari UN Security Council (UNSC) den tanü, Brehostibar nü benokogo.
“Islamabad-i nuclear osettsüset lendong atalokdaktsütsü maparen nung mamshidaktsütsü asoshi nungdakba maparen inyakogo,” ta shia, Pakistan-i par linük NSG nung züngsemdaktsütsü takhangbaji benok.
NSG nung alima linük 48 tashi züngsema lir aser iba tenteti alima ajunga nung nuclear technology den sentakba shishilembabaren tendanga kasaji ketdang asür.
“Tongpang nung amshitsü nuclear osettsüset yanglua kasaji rizüngba maparen nokdangtsü atema renemba telatetba nung ajemdaker, bendanga amshibaren kechi meli, UNSC-i ozü linüka NSG nung züngsemdaktsütsü akhanger,” ta Pakistan tenüng nung UN nung o jembitsür, Maleeha Lodhi-i metetdaktsü.
Meimchir khen nung meyirijang jenti tepsettetba tongpang oset yanglua rizüngba indang jembia, “Ozü Pakistan-i Comprehensive export control mapatong takok ngua inyakogo, Nuclear Security Summit mapatong nunga tongti shilem agiogo, Convention on Physical Protection of Nuclear Material telatetba melenshitsü asoshi 2005 küm agiba telemtetba mapa küma inyakogo,” ta lai par Pakistan metenja ashi.
“Pakistan-i tarutsü mapang nuclear osettsüset tendangba maparen anentsü renemba osang alima dang sangoktsüogo aser India den aroki lungjemer tongpang nung amshitsü nuclear osettüset tendangba maparen nokdangtsü mulungba olena metetdaktsüogo  aser item maparen ajunga takok ngua inyakba ajanga ozü Pakistan-i NSG nung züngsemtsü temeten ngua lir,” ta Lodhi-i shisem.
NSG nung züngsemtsü asoshi Pakistan aser India nati merangba osang bushiteta lir saka China densema, NSG nung züngsemba linük 10 shi India NSG nung züngsemdaktsütsü maparen anemtsü tenzüka lir.