Pak-i UN senden nung drone ken o benoker

Geneva, June 16 (Agencies): Pakistan linüki United Nations Human Rights Council (UNHRC) senden nung US-i nisung memeni anüng nung yimdaktsüba drone tayimtsü amshia, Pakistan nungi temelaba magi par Pakistan lushi telung nung amakba maparen inyakba ken o tanü, Brehostibarnü benokogo.
“US-i par drone tayimtsü amshia Pakistan lushi telung nung amakba maparen inyakba ajanga tai maketba nisung jenti taküm samatsüba den külemi, iba maparenji Pakistan’er peisasa pei madak yimsü asütsü temeten anema inyaker lir,” ta Switzerland kübok Geneva nung amenba UNHRC senden nung Pakistan’er UN ketdangser, Tehmina Janjua-i metetdaktsü.
“US-i Pakistan’er peisasa pei madak yimsü asütsü temeten aser nübur nem agütsüba temeten anema inyakba maparen nokdangtsü asoshi UNHRC ajungshir,” ta lai ashi.
US-i par drone tayimtsü amshibaji UN telatetba, alima temzüng ozüng aser meimchir nem agütsüba temeten anema inyakba magizüktetba maparen ka lir ta lai nenshia ashi.
US-i par drone tayimtsü amshia, Pakistan nungi temelaba magi par lushi telung nung inyakba maparen anentsütsü asoshi Pakistan-i taoba mapanga takhangba benoka lir.