Pak-i UN senden nung Jadhav ken o benok

United Nations, Aenjeti 20 (Agencies) : India nunger atema itdangitraba maparen inyak ta aitsür külen tasüba temerenshi agüja alisang, Kulbhushan Jadhav ken o ka tanaben Pakistan nungeri Security Council senden alidang benoka jembi.
“Kiralongraba dak sendakba nung shirnokisa pei yimya melenshia jembir, parnok jagi ozü lima anema mejembidang peisasa mezüngbuba pei otsü reprangshimtsüla. Onoki India nunger itdangiter la pua aliba jagi kuli tejangja sayur,” ta Afghanistan dak sendakba nung Council senden alidang Pakistan nungi shimteta aliba Permanent Representative, Maleeha Lodhi-i metetdaktsü. Lai iba nisungba tenüngjibo mashi. Pakistan nungeri ajungmesoa Afghanistan nung anogoshi kiralongrabaren inyakdaktsüba ama kasaji India nunger nema timtem agütsür, ta Afghanistan onük nungsa Council senden ka nung jembidang India nungeri ashiba olen ka langzüa metetdaktsüdang lai ibaji shiogo.
Retired Navy officer Jadhav jagi sorkar atema meinyak, ta India nungeribo ashir aser tiyazü nung odakdak nokdaker asüngdangyaba kuli sayutsü asoshi paji Pakistan nungeri Iran nungi pua bener ao ta metetdaktsü.
Pakistan nung kiralongrartem jenoka melidaktsür mesüra parnok meyarir ta metetdaktsüba mapang, US nungeria ibaji asangsang nung jangjashitsü nüngdaker, ta Lodhi-isa shiogo.