Pak, India NSA nati arrtsülen tensa süngjemtsü bangjem

Islamabad/New Delhi, October 03 (Agencies): Pakistan aser India linük na nungi  National Security Advisor (NSA) ana tsüngda phone ajanga jembiba sülen linük ana tsüngda arrtsülen tensa süngjemtsü bangjemogo, ta Hombarnü Pakistan ketdangser, Sartaj Aziz-i tanü metetdaktsü.
Kiralongrartemi Uri amakba aser India-i ibaji mangyanga Line of Control (LoC) nung kiralongrartem tesep amakba sülen linük ana tsüngda mezüng tongtepratepa jembibaji ibaji asütsü.
Aziz-i ashiba agi, India’er NSA, Ajit Doval aser Pakistan’er NSA, Nasir Janjua na tsüngda phone ajanga tongtepratepa jembi.
“Pakistan-i LoC nung tensa süngjemner aser Kashmir onük nung ranglokner,” ta Aziz-i jembiba o Geo News ajanga metetdaktsü.
Pai ashiba agi, alima nem Kashmir onük amadokdaktsütsü atema India-i tensa tamajungba kümdaktsütsü meranger.
Taoba hopta Indian Army-i Pakistan-occupied Kashmir (PoK) nung aliba LoC nung kiralongrartem tesep amakdang kiralongrar 38 tepseta liasü.
Ajisüaka Pakistan-ibo ibaji India-i kiralongrartem amakba masü saka arrtsülen kahtepba dang lir, ta shiogo.
Tawa Pakistan Ato kilonser, Nawaz Sharif-i US semdangba dak sentakba nung Aziz-i, ozü Ato kilonseri alima lenirtem dang, Kashmir atema bangzüng ka merenem tashibo linük ana tsüngda arrtsülen tatalokbatem manentsü ta shiogo, ta metetdaktsü.