Pak: Karachi train lendong nung nisung 21 tsükset; 50 shi yiru

Pakistan anülulentip tsütsü, Karachi yimti nung train lendong atalokba sülen nüburtemi rescue ketdangsertem mapa inyakba reprangba noksa nung angur. (Karachi, November 03)

Karachi, November 03 (Agencies): Pakistan anülulentip tsütsü, tzüyimkümlen tentetba Karachi yimti nung train lendong ka atalokba osang ka sorkar ketdangsertemi tanü, Brehostibar nü metetdaktsüogo.
Karachi kübok Gaddafi Town nung tentetba Juma Goth Train station nung Zakaria Express train-i anena aliba Fareed Express train dak tsükokja, tanep 7:18 ako meta lendongji ataloka liasü.
“Fareed Express train-i Karachi yimti toktsür Lahore bushita aotsü renemshia alidang tanep lendongji atalok aser iba lendong nung nisung 21 tsüksetba aser nisung 50 shi yiruba osang tang tashi nung jangjaogo,” ta Pakistan Railway Minister, Khwaja Saad Rafique-i metetdaktsü.
“Zakaria Express train anishisangi train anena aliba singal junga mereprangba ajanga tan lendongji atalokba osang bushiteta lir,” ta shia, tan lendong nung yirur nisungtemji Jinnah Hospital nung anepalua aliba olen ka pai shisem.
Tan lendong atalokba atema sasa bilemba olen ka lemsatepba den tan lendong atalokba osang jangjatsü atema nungdakba bushisüngdang mapatong tekaratiba mapang nung agitsü aser nungdakbapur nem mozü mora peria agüja yaritsü tetuyuba ka Pakistan Tir, Mamnoon Hussain aser Ato Kilonser, Nawaz Sharif natia metetdaktsüogo.
Ano külen, tan lendong nung asür shia indang adianutem nem temonok sen 10,00,000 aser yirur shia nem sen 500,000 agütsütsü tenangzükba ka Rafique-isa metetdakja liasü.
Karachi bushia aoba train kati Punjab province kübok Multan nung anena aliba train ka dak tsükoka, taküm September ita lendong kanga sashia atalokba osanga bushitetogo.
Iba lendong nung ishiba agi nisung 6 tsüksetba aser nisung 150 shi yiruba osang bushiteta lir.