Pak mapa tajung atema India-i Ramzan yoktsü

New Delhi, October 27 (Agencies): Küm 15 tejaklen India tsür ka tenüng agi, Geeta memeteti arrtsü adener Pakistan-i aiba sülen yashi India tonga anir aruogo; Iba maparen nung Pakistan-i mapa tajung inyakba atema India sorkaria iba mapa tajungji meyipja Karachi nungi India telungi aiter alir arishi küm 15 asangur chanu, Mohammad Ramzan Pakistan-i meyipa yoktsü.

Ramzan taküm otsü ya Geeta taküm otsü den kanga mesükteper. Pa arishi küm 10 asüba mapang tebui pa Bangaladesh-i anir aoba ajanga tetsü den pilaa  liasü, ajisüaka rabir tetsüi pa reshikangshiba ajanga tetsü ajurutsü teimla nung pa India litsü telungi aita liasü.

Ramzan tetsüi video ka upload süa par jabaso meyipa arutsü atema India dang mepishiba sülen tang Prime Minister’s Office (PMO)-i tekaraba nung Ramzan Karachi-i yoktsü atema inyaktepdar.

Video-conferencing ajanga Ramzan tetsü, Razia Beghum-i, tesüiba küm ana tashi lai lar jabaso kong aliar ibaji bushia liasü, ta ashi.

“Pai kecha memetet. Ni Bangladesh nung tetsü (Otsüla) aser tebou den jembitsü merangdangogo, ajisüaka parnoki magizük. Ozü jabaso India nung lir ta ni tesülen metet. Külen (Pakistan) tsütsü yagi ozü jabaso yokang ni India nübur dang mepishir. Ni ozü jabaso tanaben aginer. Ozü jabaso meyipa anir arutsü atema ni Pakistan sorkar dang mepishir,” ta lai shia liasü.

Ramzan-ia, “Kütsü aser kübu na bala. Kübu küna Bangladesh-i aoba sülen pa tanaben kibong aküm. Mapang ka nungbo tejashi nung pai ni kidang nungi oang ta ashi. Ni ki toktsür ao aser arrtsülen alirtem dang kütsü Pakistan nung lir ta shia kü otsü ashi. Parnoki kü nem sen agütsü aser arrtsü adentsü atema yari. Ni train nung Bhopal-i aoba mapang tetsür kati ni jeba angu, iba sülen ita tenet lir ni parnok dang ni Pakistan nungi ta ashi. Iba mapang nungjagi tenzüka parnoki ni tanaben meyipa yokner,” ta shia liasü.