Pak media-i India mission nung inyaker ketdangser 8 sangdongogo

Islamabad/New Delhi, November 03 (Agencies): Brihostibarnü Pakistan nunger media-i Islamabad nung aliba Indian High Commission nung inyaker staff ti tenüng sangdongogo, aser parnoki Pakistan anemba mapatem inyaker, ta tai tongloktsü.
Pakistan-i Delhi nung Pakistan High Commission nung inyaker ketdangser trok meyipa arutsü ajaba sülen ghonda ishika tsüngda Bodhbarnüü India-ia ketdangser tipronglaji meyipa anir arutsü atema telemtetba agia liasü.
Tamasabo Pakistan media-i India nunger ketdangser tenüng ana dang metetdakja liasü, ajisüaka Bodhbar ayaterm tashi nungbo ajak agi tenüng ti metetdaktsü.
Dawn osangkaket ajanga ashiba agi, Indian intelligence nisungtem rongnung commercial counsellor Rajesh Kumar Agnihotri, Press & Culture first secretary Balbir Singh, Commercial first secretary Anurag Singh, visa attache Amardeep Singh Bhatti, visa assistants- Dharmedra, Vijay Kumar Verma aser Madhavan Nanda Kumar aser personnel welfare office assistant, Jayabalan Senthil nunger lir.
Media osang ajangasa, item ketdangsertemji RAW mesüra Intelligence Bureau atema inyaktsürtem lir.
Ajisüaka Foreign Office-ibo item tenüngji official süa sangdonga mali.
Kasa osang ajanga ashiba agi, India nunger agent temji Pakistan anema inyakba mapatem nung densema lir, item rongnung China-Pakistan Economic Corridor (CPEC) aser linük nung timtem agütsütsü merangba densema lir.
Dawn osang ajangasa, taruba anogotem nung Pakistan ketdangsertemi item nisungtemji melung masüba ketdangsertem ta sangdongtsüa akok.