Pak mitkari IS telok nem tongpang osettsüset agütsür

Kabul, February 25 (Agencies): Pakistan mitkari Islamic State (IS) kiralongrar telok nem tongpang osettsüsettem agüja yariba den külemi, parnoki IS züngsemtem nem Afghanistan nung tongpang raratsü terenemshibarena agütsüba osang ka IS telok toktsürtemi metetdaktsüogo.
Afghanistan mitkartem anema raratsü tuyua, Pakistan mitkari Afghanistan nung tentetba IS züngsemtem nem tongpang raratsü osettsüset agüja yarir ta parnoki ashi.
“Pakistan mitkari IS züngsemtem nem tongpang raratsü osettsüset agütsüba den külemi, tongpang raratsü terenemshiba agütsüba sülen, Afghanistan mitkar züngsemtem Islam tamangba yimsü anema inyakertem lir ta shia, Afghanistan mitkartem anema raratsü asoshi IS züngsemtem ajungshir,” ta Afghanistan-i ayongba yimjung sentong nung shilem agitsü temulungtetba nung IS telok toktsür, Zaitoon-i osang jangjashitsü.
“Afghanistan’er Nangarhar province kübok Nazian district nung Afghanistan mitkartem anema raratsü ozüng onok nem agütsü aser onoki anogoshia atalokba osangtem Punjabi aser Pakistan mitkartem den benoka liasü,” ta Zaitoon den külemi IS telok toktsür, Arabistan-ia metetdaktsü.
“Afghanistan sorkari tentetba High Peace Council (HPC) züngsemtemi mapa kanga junga inyakba ajanga Zaitoon aser Arabistan na densema, nisung 10 tashi IS telok toktsü yimjung sentong nung shilem agitsü renema osang bushiteta lir,” ta Nangarhar Provincial Council nung mendenbuba, Malik Nazir-ia metetdaktsüogo.