Pak mitkartemi kiralongrar 25 tashi tepset

Islamabad, October 1 (Agencies): Pakistan mitkartemi par fighter jet tayimtsü amshia Afghanistan arrtsülen tesep tentetba kiralongar nisung 25 tashi tanep Brehostibar anepdang tepsetba osang ka mitkar lenirtemi metetdaktsüogo.

Tanep amakba maparenji Pakistan nung tentetba Taliban telok aser Haqqani network telok den sentaktepa alir kiralongrartem atsükdak, North Waziristan kübok Datta Khel nung inyak ta parnoki ashi.

Pakistan sorkari par lushi ajunga nungi kiralongrar ajak meshi meshia samatsü lemtetba osang ka Pakistan Ato Kilonser, Nawaz Sharif-ia tang New York yimti nung temendak United Nations General Assembly senden nung tan Bodbar nü metetdaktsüogo.

Par mitkartemi tang North Waziristan densema telungpur aser kiralongrartemi tesep tentetba aliba tesemtem mita parnok makdokba mapatong, Zarb-e-Azb takok tulu ngua inyakba osang ka pai lemsatepa liasü.

“Ozü mitkar züngsem 180,000 dak temai lima ajunga nung kiralongrar mita amakba mapatong tulutiba, Zarb-e-Azb takok tulu ngua teinyakdak lir. Ozü Pakistan lushi nung tesep tentetba kiralongrar aser telungpur ajunga meshi meshia memakdok tashi iba mapatongji inyaktsü renema lir,” ta Sharif-i nenshia ashi.

Pakistan mitkartemi June, 2014 nungi tenzüka Zarb-e-Azb mitkar mapatong inyaktsü tenzükba sülen tanü tashi nung bendangertem densema kiralongrar 3,500 dak tema tepsetba osang bushiteta lir.

Kasa mapatong inyakdang Pakistan mitkar züngsema nisung 400 shi asüba osang bushitetogo.