Pak NSA Aziz aser Hurriyat lenirtem senden amentsü

New Delhi, August 21 (Agencies): India-i Pakistan dang par linük NSA, Sartaj Aziz aser Hurriyat lenirtem New Delhi nung senden mamentsüla ta shiaka Pakistan-i ibaji magizüki Hokolbar nü, parnok (Hurriyat) den shisalemsatepba yimya mesentoktsü, ta shiogo.

Pakistan Ministry of Foreign Affairs (MoFA)-i, kidanger linük semdangba mapang lenirtemi teti agia Hurriyat lenirtem ajurua aruogo aser iba yimya sentoktsü kuli madoker, ta ashi.

Pak MoFA-isa, India-i telatetba agütsübaji ajanga tesentaktep nung tashi maitba temaitsü sayur, ta ashi.

“Islamabad-i telatetba kecha makai NSA senden nung adentsü melunga lir,” ta Pakistan MoFA sangdong ka ajanga ashi.

Tanep India-i ken o atsü-anemtepa kanür saka Pakistan dang Kashmir Seperatist lenirtem majurutsüla ta tuyuogo, aser Islamabad nungi telangzübaji atar, ta shia liasü.

Sangdong ka ajanga India Ministry of External Affairs otongdar Vikas Swarup-i, August 23-24 India NSA Ajit Doval den senden amentsü sentong lia Aziz-i Hurriyat lenirtem ajurutsüji tim masü, ta ashi.

Iba sangdong agütsüba sülen ghonda ishika tsüngda Pakistan sorkar osang ajanga, “Hurriyat lenirtem den ken o tejembitak. Pakistan-i India nungi tetuyubaji mangatsü. (India-Pak) ken oji telatetba kar nung ajemtaka mali,” ta ashi.

Pakistan-isa India-i ken o jembitsü aliba nungi ajentsü meranger ta aitsüogo.

Tang mezüngsüa August 23 nü India aser Pakistan naprongla nungi NSA senden Delhi nung amentsü aser iba senden nung kiralongraba dak sentakba onüktem jembitsü.

Russia, Ufa nung nung Pakistan aser India Ato kilonser na senden amenba mapang linük anaprongla nungi NSA senden amentsü asoshi bangjemtepa liasü.