Pak nung Afghan tongpang anentsütsü senden amentsü

Kabul, January 09 (Agencies): Afghanistan, Pakistan, China aser United States nunger densemba linük 4-i Afghanistan tongpang anentsütsü senden ka Pakistan nung amentsü renemogo.
“Linük 4 nungi lenirtemi Pakistan nung senden mena Afghanistan nung tongpang rarabaren anentsütsü asoshi lenmang aser tasa bushia jembitsü renemogo,” ta Afghanistan Foreign Ministry otongdar, Ahmad Shekib Mostaghni-i tanü sangoktsü.
Paisa ashiba agi, Afghanistan Deputy Foreign Minister, Hekmat Karzai-i anir par linükia iba senden nung shilem agitsü renema lir.
Pakistan mitkar lenisang, General Rahell Sharif-i taoba December ita Kabul semdangdang tan Pakistan nung senden amentsü sentongji renemba osang jangjaogo.
Ajisüaka, tan ayongba senden nung Taliban telungpur telokbo mejaoktsü renema lir.
Taliban teloki US-i nungitba Afghanistan sorkar den taoba küm 15 shi tongpang kanga sashia rara saka par teloki tangbo sorkar mitkartem amakba maparen anenogo.
Yaküm, 2015 küm mei mapanga Pakistan-i ayonger külen Afghanistan sorkar ketdangsertem aser Taliban telungpur telok nati yimjung senden mena liasü.
Par telok anati maneni yimjung senden amentsü sentong renem  saka Taliban lenisang, Mullah Mohammad Omar asüba osang jangjaba sülen Taliban teloki tanabuba yimjung sendenji amentsü memulungi aküm.