Pak nung Hindu nunger kata malitsü anogo menoa mali

New Delhi, August 05 (Agencies): Joko küm aika Pakistan nung Muslim tamang yimsü metsünga-reta amangertemi Hindu tekülem kitem amaker, Hindu nunger tekülem ki aika rongtoktsüogo, Hindu tsüngremtem raksatsüogo aser tamangba yimsü kakettem rongtoktsüogo.
Pakistan nung Hindu nunger million tenet lir aser Muslim nunger million 195 lir.
BBC den jembidang Pakistan, Wakf department nung putir Jairam-i, 1971 küm Hindu sobaliba raksatsüogo. Tamangba kaket nungi tesayuba aser Sanskrit oshi tesem kecha nunga mesayur, ta ashi.
Paisa, Sanskrit oshi school nung züngoktsü aser Hindu kaketshirtem atema Hindi oshi tesayur shimtsü atema bill ka Sindh sorkari benoka liasü, saka iba bill ji magizük. Item onüktem atema bill ka magizükra Pakistan nung Hindu nunger kata malitsü anogoji menoa mali, ta ashi.
Yaküm Dawn osang ajanga ashiba agi, Pakistan nung Hindu nunger apur aser Hindu yimsü amanger aiür chanutem kangshia tamangba yimsü meyipdaktsür, sen akhangtsü atema Hindu nunger shishilembartem apur, iba den külemi tekülemi ki raksatsüba ajanga Hindu nunger aika India-i aor mesüra tanga linüki aotsüsa akümer.