Pak nung Pathankot amakdag shilem agir ta temulung melemi bilemer kar puogo

Islamabad, January 11 (Agencies): India nung aliba Pathankot air base amakba sülen Pakistan linük ketdangsertemi linük tesem aika nung mita operation agidang iba lendong nung shilem agir ta temulung melemi bilemer kar pua arua lir, ta intelligence ketdangsertemi Honibarnü metetdaktsü.

Parnoki ashiba agi, Gujranwala, Jhelum aser Bahawalpur district tem nung mita oa liasü aser iba mapang nisung kar apu.

“Pua alirtemji iba amakba nung aden asü masü mesüra kar tetuyuba nung iba mapa inyakar metettsü atema asüngdangyatsü tenzükogo,” ta parnoki ashi.

Item nisungtem apuba ajanga Pakistan Ato Kilonser Nawaz Sharif-i IB, Inter-Services Intelligence, Military Intelligence, Federal Investigation Agency aser Police department tem lokteper Pathankot amakba dak sendakba nung Pakistan densem asü medensemar kanga aroka ia bushisüngdangang, ta ozüng agütsüogo.

Sharif-i, iba bushisüngdang ochi shia agitsü aser shitakba aia alirtem odangbo metoktsütsü, ta shiadokogo.

India nung Pathankot amakertemi amshiba Pakistan phone number tem den nüngdangba osang ajak Pakistan nem agütsüogo aser Islamabad dang item phone amshirtem aser amaktsü sentong yanglurtem ozüng agi melaba ama merenshiang, ta India-i shiogo.