Pak nung Raj Kapoor asoba ki tera bensaogo

Peshawar, January 17 (Agencies): Peshawar nung Bollywood nung shilem agir tejen Raj Kapoor asoba ki kiburi tera bensaogo, ta Dawn osang kaket ajanga Deobarnü metetdaktsü.
Tang ki kibur tasenbai, municipal ajanga pa dang iba ki abentsü asoshi ashi kechiba süra ki ya kanga tejen aser mashi mapang nung chireptsü akok,” ta ashi.
Archaeology directorate ketdangsertemi, “Honibar aonung onoki iba ki wazüka ayutsü atema telemtetba agir aodangbo pezüben atongtepa süa aliba, küm 98 tain “Kapoor Haveli”‘ ki indang temaba takdangbo bener liasü, ta ashi.
Iba ki ya Dhaki Munawar Shah tesem nung lir aser onoki ki mekümzüktet, kechiba süra anünga aliba takdaktema joko tagitsü majung raksar liasü, ta parnoki ashi.
Iba tesem nung councel züngsem, Mian Zulfiqar-i, iba tesem nung aliba nüburtemi ketdangsertem ki ya kanga tejen anungji meyimlaba mapang chirepa anasa aliba nüburtem nem timtem agütsütsü aiben shia aruogo, ta ashi.
Iba ki abenba nanüng angashidang ang archaeology department pur shishi. Menoknok anokba mapanga parnoki iba ki tashi ait mait metettsü kodanga memeranger, ta pai ashi.
Zulfiqar-i, iba ya nüngo ki ka süra, ki mebensa dang yongi wazüka ayutsü asoshi directorate-i anepaluteptsü nüngdaka liasü, ta ashi.
Sarhad Conservation Network ajanga ashiba agi, iba ki bensaba ajanga Peshawar nung aliba lokti tentet balala aser iba ki meimertem kanga aoksatepa liasü.
Kasa network ajanga ashiba agi, sorkari kara teinyaktsü tim meinyakra iba ki teti atema samatsü.
Tesüiba mapang Khyber Pakhtunkhwa sorkari Peshawar nung asor Raj Kapoor aser Dilip Kumar nunger ki ya wazüka kümzüka ayutsü shiogo.
Ketdangsertemi ashiba agi, Honibar nü ki bensaba meteta parnoki police dang ashi, ajisüaka police-i ki bensaba anendaktsütsü melena parnok dang tezüluba ang ka meshi.
Mapang talangka yamaji atsüteper police tem onok den ki bensatsüba tesemi arua ki abenba anendaktsü, ta ketdangser kati ashiba Dawn osangkaket ajanga metetdaktsü.
Taa agia iba ki bensar parnok pezü tashi tang police-i pua lir.
Raj Kapoor ya December 14, 1924 nü aso aser pa arishi küm 10 asüdang nungi film nung shilem agitsü tenzük. Iba mapang nungi tenzüker Asia aser Europe na dena, alima tesem ajak nung pa ya actor, producer aser director tem rongnung tajungtiba ka ta züngshia aru.
Pai mezüng shilem agiba film ji “Inquilab” (1935) liasü. 1947 küm “Neel Kamal” film nung shilem agiba ajanga pa kanga nüngtugu aküm. Iba den külemi pai “Boot Polish”, “Sangam”, “Mera Naam Joker”, “Awaara” aser “Shree 420” film tem nunga shilem agia liasü.
Pai India cinema nung takok ngua shilem agitetba asoshi 1971 küm Padma Bhushan award angu.