Pak nung sen taila menüngba press anentsüsa kümogo: Rijiju

New Delhi, November 09 (Agencies): Tanü Union Minister, Kiren Rijiju-i, Rs 1000 aser Rs 500 note amshiba anentsüba ajanga Pakistan nung India sen taila menüngba “printing press” anentsüsa akumtsü, ta ashi.
Ato kilonseri tasütait telemtetba agiba atema tenüngsang agüja Rijiju-i, iba mera agiba ajanga black money aser ochimashi nokdangba den külemi kiralongratsü atema senotsü lenmang shibangtsü aser India sen taila amshiba anentsü, ta ashi.
Delhi nung osangbenertem den jembidang Rijiju-i, “Sen 500 aser 1000 note anentsüba ajanga Karachi aser Peshawar nung aliba printing press anentsüsa akumtsü,” ta ashi.
Minister of State for Home, Rijiju-isa, sen taila amshiba ya security agency tem atema tongti tebilemtsütem rongnung ka kümogo, ta ashi.
Linük nung black money, sen taila aser ochimashi anentsü atema yasüng ajungbena Ato kilonser Modi-i, tang tamshidak Rs 1000 aser Rs 500 note anentsür, ta sangdonga liasü.